Astanada Konstıtýtsııa kúnine oraı otshashý bolmaıdy - ákimdik

ASTANA. QazAqparat – Astana qalasy Іshki saıasat basqarmasynyń basshysy Dáýren Babamuratov Konstıtýtsııa kúnine oraı elordada otshashý bolmaıtynyn aıtty, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken baspasóz máslıhatynda Astanada Konstıtýtsııa kúnine oraı ótkizilgen jáne ótkiziletin sharalar týraly málimet usynyldy.

Dáýren Babamuratovtyń aıtýynsha, jalpy qalada Konstıtýtsııa kúnine oraı 70-ten astam buqaralyq, sporttyq-mádenı shara josparlanǵan. Búginge deıin sonyń 20-dan astamy uıymdastyryldy. Aldaǵy kúnderi 50-ge jýyq shara ótedi. Sol sharalardyń ishinde respýblıkalyq báıge týrnıri de bar.

«Astana qalasy ákimdiginiń qoldaýymen jáne qalalyq At sport túrleri federatsııasynyń uıymdastyrýymen 30 tamyz kúni at sporty túrlerinen respýblıkalyq báıge týrnıri ótedi. Oǵan elimizdiń búkil óńiri men qalalarynan 100-ge tarta tańdaýly júırik qatysady. Báıge «Qazanat» atshabarynda ótedi. Shara saǵat 11.00-de bastalady. Sáıgúlikter 2 400 metrlik «ushqyr báıgede», 18 shaqyrymdyq «top báıgede», 25 shaqyrymdyq «alaman báıgede» baq synaıdy. Jarystyń jalpy júlde qory – 20 mln teńge. Kirý tegin», - dedi qalalyq dene shynyqtyrý jáne sport basqarmasynyń basshysy Samat Jylqybaev.

BAQ ókilderi Konstıtýtsııa kúnin toılaýǵa Astana bıýdjetinen qansha qarajat bólingenin surady.

«Dál Konstıtýtsııa kúnine dep arnaıylap qarajat bólingen joq. Mádenı is-sharalar tizbegi de, sporttyq is-sharalar tizbegi de jyldyń basynda bekitilgen, jospar boıynsha ótip jatyr», - dedi Dáýren Babamuratov.

Sondaı-aq, ol Konstıtýtsııa kúninde otshashý bolmaıtynyn aıtty.