Astanada Konstıtýtsııa kúnine oraı halyqaralyq konferentsııa bastaldy
Halyqaralyq sharaǵa sheteldik meımandarmen birge el bıligindegi birqatar laýazymdy tulǵalar kelgen. Olardyń ishinde QR Memlekettik hatshysy Gúlshara Ábdihalyqova, QR Joǵarǵy sotynyń tóraǵasy Qaırat Mámı, QR Іshki ister mınıstri Qalmuhambet Qasymov, t.s.s. tulǵalar bar. Konferentsııanyń ashylýynda memlekettik hatshysy Gúlshara Ábdihalyqova jıynǵa qatysýshylarǵa Prezıdent Nursultan Nazarbaevtyń quttyqtaýy hatyn oqyp berdi.
«Qurmetti hanymdar men myrzalar! Qazaqstannyń basty merekeleriniń biri - Konstıtýtsııa kúni qarsańynda Sizderdi ««Konstıtýtsııa jáne qoǵam men memlekettiń jańǵyrýy» atty halyqaralyq ǵylymı-praktıkalyq konferentsııasynyń ashylýymen shyn júrekten quttyqtaımyn. Bizdiń Ata zańymyz zańdylyqtyń, kelisimniń jáne elimizdiń qarqyndy damýynyń kepili bolyp tabylady. Búgin de Qazaqstandy búkil álemde jahandyq antııadrolyq qozǵalystyń kóshbasshysy dep tanıdy. Bizdiń elimiz BUU qaýipsizdik keńesiniń turaqty emes múshesi boldy. Astanada «EKSPO-2017» halyqaralyq mamandandyrylǵan kórmesi ótýde. Elimizde ekonomıka men áleýmettik sala nyǵaıýda. Bıznes pen azamattyq qoǵam damýda. Biz Konstıtýtsııany basshylyqqa ala otyryp, aýqymdy máselelerdi sheshemiz jáne 2050 jylǵa qaraı Qazaqstan álemniń damyǵan 30 eliniń qataryna enýi tıis. Bıyl biz elimizdiń damýynyń 25 jyldyq tájirıbesi men jurtshylyq pikirin keńirek eskere otyryp, konstıtýtsııalyq reforma júrgizdik. Onyń negizi bılik tarmaqtary arasynda birqatar ókilettikterdi qaıta bólý, Parlament pen Úkimettiń derbestigi men jaýapkershiligin nyǵaıtý, qorǵalatyn konstıtýtsııalyq qundylyqtardy, adamnyń jáne azamattyń quqyqtary men bostandyqtaryn qorǵaý tetikterin nyǵaıtý, sot júıesi men memlekettik basqarý negizderin jańǵyrtý. Konstıýttsııalyq ózgerister qoǵam men memlekettiń tynys-tirshiliginiń barlyq salalaryn odan da ary jańǵyrtýdyń berik negizin qalaıdy. Osy turǵyda Qazaqstanda konstıtýtsııalyq konstıtýtsııalyq reforma men ony iske asyrý qazaqstandyqtardyń da, sheteldik qonaqtardyń da zor qyzyǵýshylyǵyn týdyrady. Konferentsııaǵa qatysshylardyń ıdeıalary men usynystary bizge paıdaly bolady, al Konstıtýtsııanyń jasampazdyq áleýetin jan-jaqty iske asyrý jolyndaǵy birlesken kúsh-jiger eldi dáıekti jańǵyrtýǵa yqpal etedi dep senemin. Qatysýshylarǵa tabysty jáne nátıjeli jumys tileımin», - dep Memlekettik hatshy Elbasynyń hatyn aıaqtady.