Astanada qonaq úılerge urlyqqa túsken kúdikti ustaldy

ASTANA. QazAqparat – Elordalyq polıtseıler qonaq úılerde bolǵan birneshe urlyqtyń betin ashty, dep habarlaıdy QazAqparat Astana qalasy Polıtsııa departamentiniń baspasóz qyzmetine silteme jasap.

Jedel-izdestirý is-sharasyn ótkizý barysynda Almaty aýdandyq polıtsııa bóliminiń qyzmetkerleri qonaq úı urysyn ustady. 20 jastaǵy Qaraǵandy turǵyny qonaq úılerde jasalǵan eki urlyqqa qatysy bar bolyp shyqty.

Tergeý barysynda belgili bolǵandaı, jas jigit kúndizgi ýaqytta qonaq úıge kirip, jan-jaǵyna baıqatpaı shatyrǵa kóterilgen. Jumys kúniniń aıaqtalýyn kútip, qyzmetkerler ketip bara jatqanda meıramhanadan 3 uıaly telefon, 3 ratsııa, qulaqqap, Power bank-ti qoldy etken. Ol óziniń osy is-áreketimen 430 myń teńgeden astam somaǵa materıaldyq shyǵyn keltirdi.

Araǵa bir-eki kún salyp, kórshiles qonaq úıdiń qabyldaý ornynan «Vivo» uıaly telefonyn ilip ketken.

Astana qalasynyń Polıtsııa departamenti shaǵyn jáne orta bıznes ıelerine qyraǵy bolýdy, obektilerde urlyqtan qorǵanýdyń qosymsha sharalaryn engizýdi usynady.