Astanada kommýnaldyq tarıfter kóterilmeıdi - Áset Isekeshev
«Respýblıkamyzdaǵy eń tómengi jylý tarıfteriniń biri - Astanada. Tabıǵı monopolııalardy retteý komıteti bekitken jylý jáne elektr energııasynyń tarıfterine, energetıka nysandaryna zaem jáne jeke kapıtal salymdaryna, ınvestıtsııalyq baǵdarlamalardy tolyq oryndaýǵa, Astananyń qýat óndirýshi nysandarynda jáne elektr-jylý jelilerinde kúrdeli jáne aǵymdaǵy jóndeý jumystaryn júrgizýge qaramastan ákimdik ishki rezervter taba aldy. Bul qýat óndirý, taratý jáne ótkizý múddelerin teńgerimdeýge múmkindik berdi jáne 2016-2017 jyldary jylytý maýsymynyń sońyna deıin jylý, elektr energııasynyń jáne sý tarıfterin kótermeý týraly sheshim qabyldandy. Sáıkes nusqaýlar belgilengen tártippen kúshine endi. Bul Táýelsizdiktiń 25 jyldyǵy merekesi qarsańynda qala turǵyndary úshin jaqsy jańalyq dep oılaımyn!», - dep jazdy qala basshysy.