Astanada kólikti ekstremaldy jaǵdaıda júrgizýge úıretetin HQKO ashyldy

ASTANA. QazAqparat - Elektrondy qyzmet kórsetý ortalyǵynda xalyqty oqytýǵa jáne barlyq qyzmetterdi ózdigimen alýǵa basymdyq beriledi. Jańa úlgidegi HQKO EKSPO aımaǵynda ornalasqan, dep xabarlaıdy QazAqparat tilshisi.

Ortalyqqa kirgen adamdardy I-sana atty vırtýaldy konsýltant qarsy alady. Ol barlyq aqparatty berip, naqty qaı sektorǵa barý qajettigin aıtady. Sol jerde «M-gov» mobıldi qosymshanyń múmkindikterimen tanysyp, elektrondy tsıfrlyq qoltańbany SIM kartaǵa júkteýge bolady.

Ortalyqtyń negizinde bıometrııalyq derekterdiń negizinde qyzmet alýdyń pılottyq jobasy iske qosyldy. Oǵan sáıkes, qujat shyǵarý úshin elektrondy tsıfrlyq qoltańba da, tólqujat ta qajet emes. Adamnyń saýsaq tańbasy men bet-álpetiniń skan-beınesi arqyly kez kelgen memlekettik qyzmetti alýǵa bolady. Aıta ketken jón, ázirshe bıometrııalyq derekterdi jańa ortalyqta, Saýran kóshesindegi tsıfrlyq ortalyqta, sondaı-aq, Almaty qalasynyń Bostandyq aýdandyq HQKO-synda tapsyrýǵa bolady.

Elektrondy qyzmet ortalyǵynda kólik sımýlıatory da bar. Atalǵan texnologııany Reseıden alyp keldi. Ol jaqta polıtseıler sımýlıator arqyly kólikti ekstremaldy jaǵdaıda júrgizýge úırenedi. Qazaqstanda ony júrgizýshi kýáligin berý úshin qoldanbaqshy. Onyń ishinde avtodromnan bastap kádimgideı qala kóshelerine deıin kez kelgen baǵdarlama bar. Al arnaıy júıe adamnyń kólikti júrgizý qabiletin baǵalaıdy. Sol arqyly emtıxan qabyldaýǵa múmkindik bar.

Sımýlıatordy kórgen QR Premer-Mınıstriniń orynbasary Asqar Jumaǵalıev jańa texnologııanyń qanshalyqty tıimdi bolatanyny zerdelep shyǵýdy tapsyrdy.

«Bálkim, avtodrom salǵansha osyndaı sımýlıatorlardy barlyq jerde qoıyp shyqqan tıimdi. Osyny zerdelep shyǵý qajet», - dedi A.Jumaǵalıev.

«Videocallroom» degen jerde kez kelgen adam memlekettik organdardyń birinshi basshylaryna beıneúndeý joldaı alady. Basshylar barlyq aryz-shaǵymdarǵa 15 kúnniń ishinde jaýap berýi tıis. Al bólek zalda memlekettik qyzmetterdi ózdigimen alýǵa úıretedi.

«Azamattarǵa arnalǵan úkimet» memlekettik korporatsııasy arnaıy termınaldardy da tanystyrdy. Ondaı termınaldardy qalanyń barlyq jerlerinde ornatýǵa bolady. Ol arqyly uıaly telefonǵa aqsha salyp qana qoımaı, qajetti memlekettik qyzmetti de alýǵa múmkindik bar.