Astanada qoǵamdyq kólik salasyndaǵy túıtkildi máselelerdiń beti ashyldy
Keńeıtilgen tyńdaýǵa Astana qalasy ákiminiń birinshi orynbasary Sergeı Horoshýn, «Astana LRT» JShS basqarma tóraǵasy Talǵat Ardan, elordanyń jolaýshylar kóligi basqarmasynyń basshysy Bekmyrza Egemberdınov jáne elordadaǵy avtobýs parkteriniń basshylary qatysty.
Qala turǵyndarynyń aldynda jolaýshylar kóligi salasyndaǵy aǵymdaǵy ahýal, engizilip jatqan ınnovatsııalar men damý jáne týyndaǵan máselelerdi joıý maqsatynda qabyldanyp jatqan sharalar týraly «Astana LRT» JShS basqarma tóraǵasy Talǵat Ardan baıandama jasady.
Onyń aıtýynsha, qala boıynsha 3500 km jolǵa barlyǵy 81 baǵdar jumys isteıdi, olar kúndelikti negizde 870 myń jolaýshyǵa qyzmet kórsetedi. Shahardaǵy aıaldama beketteriniń sany - 1119, sonyń 760-synyń pavılondary bar, qalǵany jabyq tıptegi jáne pavılondarsyz. Qala turǵyndary ózderin mazalaǵan suraqtardy talqylaýǵa usyndy. Astanalyqtardyń shaǵymdaryn quziretti mamandar qabyldap, barlyq máselelerdi barynsha qysqa merzimde pysyqtaýǵa ýáde berdi. Al jolaýshylardyń qalalyq baǵdarlardyń aralyq ýaqytynyń uzaqtyǵyna qatysty shaǵymdaryna avtobýs parkteriniń ókilderi qarbalas sátterde avtobýstardyń keshigýine jol qıylystaryndaǵy qozǵalystyń qolmen retteletindigi, qar jınaý jumystary jáne jeńil avtokólikterdiń kóptigi áser etetinin jetkizdi.
Astana ákiminiń birinshi orynbasary Sergeı Horoshýnnyń aıtýynsha, kóterilgen máselelerdiń barlyǵy qala basshylyǵynyń erekshe baqylaýyna alynyp, jyl basynan beri kezeń-kezeńmen joıylatyn bolady. Sonymen qatar, 2017 jyldyń naýryzynda jańa avtobýstar satyp alynady, bul qalalyq kóliktiń servısi men sapasyn jaqsartýǵa septigin tıgizedi. Apatty jaǵdaıdaǵy avtobýstar qatardan shyǵarylady. Sondaı-aq, «EKSPO-2017» halyqaralyq kórmesi bastalǵanǵa deıin sheshýdi qajet etetin birqatar máseleler naqtylandy, dep habarlaıdy astana.kz.