Astanada qoǵamdyq tártipti buzǵandar jazalandy

<p>ASTANA. KAZINFORM &mdash; Elordada qoǵamdyq tártipti buzýshylarmen jáne vandalızmniń kez kelgen jaǵdaıymen kúres jalǵasýda. Quqyq qorǵaý organdary quqyq buzýshylardy anyqtap, olardy jaýapqa tartady, dep habarlaıdy Astana ákimdiginiń resmı saıty.</p>

14 qarasha kúni tańǵy saǵat 5 shamasynda 29 jastaǵy astanalyq qonaq úıdiń aldyńǵy esigin syndyryp, bótenniń múlkin qasaqana búldirdi.

Sol kúni saǵat 20:30 shamasynda elordanyń oıyn-saýyq oryndarynyń birinde 33 jastaǵy qala turǵyny janjal shyǵardy. Ashý ústinde ol bólmeniń esigi men qabyrǵasyn ádeıi zaqymdaǵan. Osy isimen shamamen 100 AEK mólsherinde materıaldyq shyǵyn keltirdi.

Taǵy bir oqıǵa 11 qarashada túski ýaqytta boldy. 34 jastaǵy er adam qoǵamdyq orynda ózin dóreki ustap, ózgelerdi qorlaǵan.

Qoǵamdyq tártipti buzýshylardyń bári tabylyp, jaýapqa tartyldy.

Aıta keteıik, jyl basynan beri Astanada eriktiler, belsendiler, tanymal sportshylar, qala turǵyndary qoldaǵan «Toqta, vandal» aktsııasy aıasynda profılaktıkalyq jumys júrip jatyr.

Aktsııanyń maqsaty – vandalızmniń kez kelgen jaǵdaıyn boldyrmaý jáne elordada tazalyq pen tártipti saqtaý.

Jyl basynan beri sot 275 adamdy bótenniń múlkin qasaqana búldirgeni, jalpy paıdalaný oryndaryn lastaǵany, ǵımarattar men turǵyn úı-jaılardy búldirgeni úshin jazalady. Olardyń barlyǵy jaýapqa tartyldy.

Vandalızmniń aldyn alý jumystary qalalyq prokýratýra men polıtsııa departamentiniń úılestirýimen júrgiziledi.