Astanada Qytaıdyń 75 jyldyǵy aıasynda Qazaqstanmen yntymaqtastyq perspektıvalary talqylandy

<p>ASTANA. KAZINFORM - Astanada &laquo;Qytaı Halyq Respýblıkasynyń 75 jyldyǵy: jetistikter men keleshekke kózqaras&raquo; atty semınar ótti.</p>

Sharany Qytaı zertteý ortalyǵy jáne KazEvent kompanııasy uıymdastyrdy. Shara barysynda sarapshylar Qytaıdyń transformatsııasynyń negizgi aspektilerin, onyń jetistikteri men Qazaqstanmen yntymaqtastyq perspektıvalaryn talqylady. 

Semınar jumysyna Nazarbaev ýnıversıtetiniń, L.N.Gýmılev atyndaǵy Eýrazııa ulttyq ýnıversıtetiniń, Maqsut Nárikbaev ýnıversıtetiniń, Amanat partııasynyń, Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýtynyń (QSZI) ókilderi, sondaı-aq BAQ qyzmetkerleri qatysty. 

Semınardyń ashylýynda Qytaıdy zertteý ortalyǵynyń dırektory Gúlnar Shaımergenova jáne QHR-dyń Qazaqstan Respýblıkasyndaǵy Elshiliginiń keńesshi-ýákili Sın Fanfan quttyqtaý sóz sóıledi. 

Ortalyq dırektory sessııany ashyp, qatysýshylar men qonaqtardy qarsy aldy jáne is-sharanyń mańyzdylyǵyn atap ótti. Óz sózinde ol Qytaıdyń álemdik derjavalardyń biri bolý úshin ótken 75 jyldyq jolynyń aýqymdylyǵy men mańyzdylyǵy erekshe ári tańqalarlyq ekenin aıtty. 

Sonymen qatar, Gúlnar Shaımergenova semınar qatysýshylarynyń nazaryn Qytaıdyń negizgi jetistikterine aýdardy. Ekonomıkalyq transformatsııa mıllıondaǵan adamdardy kedeılikten shyǵarsa, Qazaqstan mańyzdy ról atqaratyn «Bir beldeý, bir jol» bastamasy elder arasyndaǵy saýda-ekonomıkalyq jáne mádenı baılanystardy nyǵaıtty. 

- Logıstıka, energetıka jáne ınnovatsııa salasyndaǵy birlesken jobalar bolashaq yntymaqtastyqtyń negizin qalap jatyr, – dedi ol. 

QHR-dyń Qazaqstan Respýblıkasyndaǵy Elshiliginiń keńesshi-ýákili Sın Fanfan óz sózinde bul mereıtoıdy el tarıhyndaǵy mańyzdy kezeń jáne halyqaralyq arenadaǵy jetistikterdiń kórinisi retinde atap ótti. 

Keńesshi-ýákil Qazaqstan men Qytaı arasyndaǵy baılanystardyń nyǵaıyp kele jatqanyn aıtyp, túrli salalardaǵy yntymaqtastyqtyń odan ári tereńdeı túsetinine senim bildirdi. Ol sondaı-aq eki el halqy arasyndaǵy dostyqty nyǵaıtýǵa jáne jemisti dıalog úshin platforma qurýǵa qosqan úlesi úshin sharany uıymdastyrýshylarǵa alǵys aıtty. 

Sonymen qatar, semınarda Halyqaralyq Astana ýnıversıtetiniń áleýmettik-gýmanıtarlyq ǵylymdar joǵary mektebiniń professory Lazzat Nursultanova, Nazarbaev ýnıversıtetiniń Bıznes joǵary mektebi strategııa jáne kásipkerlik kafedrasynyń dotsenti Djııan Dýn, L.N.Gýmılev atyndaǵy Eýrazııa ulttyq ýnıversıtetiniń memleket jáne quqyq teorııasy men tarıhy, konstıtýtsııalyq quqyq kafedrasynyń profesory Jamaladen Ibragımov, JOO «Qytaı túlekter dostyǵy qaýymdastyǵynyń» tóraıymy Djamılıa Eleýsizova, TALAP qoldanbaly zertteýler ortalyǵynyń dırektory Qysyqov Asqar jáne QR Syrtqy ister mınıstrligi Syrtqy saıasat zertteýleri ınstıtýtynyń «QR syrtqy saıasatynyń eldik basymdyqtary» tobynyń aǵa zertteýshisi Ulan Nuhıtjan óz baıandamalaryn usyndy. 

Semınar qorytyndysy boıynsha ekijaqty yntymaqtastyqty odan ári nyǵaıtýǵa baǵyttalǵan naqty usynystar ázirlendi. Mádenı ózara is-qımyldy damytýǵa, gýmanıtarlyq baılanystardy keńeıtýge jáne ınnovatsııalyq jobalar boıynsha birlesken jumysqa erekshe nazar aýdaryldy. Qatysýshylar mádenı yntymaqtastyq pen ǵylym, tehnologııalar jáne bilim salasyndaǵy birlesken bastamalar eki el múddelerine sáıkes keletin «ortaq taǵdyr qaýymdastyǵyn» qurýdyń senimdi negizin qalaıdy degen ortaq pikirge keldi. 

Buǵan deıin habarlaǵanymyzdaı, Qazaqstan Qytaıǵa maı ónimderi eksportyn $250 mln jetkizýdi kózdep otyr.