Astanada QHA etnomádenı birlestikteriniń kúnderi bastaldy

ASTANA. QazAqparat - Qazaqstan Respýblıkasy Táýelsizdiginiń 25 jyldyǵyn merekeleý aıasynda elordadaǵy kólik jáne kommýnıkatsııalar kolledjinde Astana qalasyndaǵy Qazaqstan halqy Assambleıasynyń etnomádenı birlestikteriniń kúnderi ashyldy, dep habarlaıdy qalalyq ákimdiktiń baspasóz qyzmeti.

Sharanyń maqsaty  QHA qyzmetin nasıhattaý, jastardy etnomádenı birlestikterdiń qyzmetine tartý, Qazaqstanda turatyn etnostardyń áleýmettik-mádenı murasyn qaıta jandandyryp, saqtaý. Kontserttik baǵdarlamada nemisterdiń «Vozrojdenıe» qoǵamynyń tárbıelenýshileri, «Qyrǵyzstan-Astana» qoǵamdyq birlestiginiń ókilderi, jáne «Tań» tatar-bashqurt mádenı ortalyǵynyń músheleri óner kórsetti. 2016 jylǵy qarashanyń sońyna deıin aýqymdy sharalar elordadaǵy alty joǵary oqý ornynda ótkiziledi.

 «Biz bastap otyrǵan sharalar kezegi stýdentterdi, mektep oqýshylaryn toleranttylyq pen otansúıgishtikke tárbıeleýge baǵyttalǵan etnomádenı birlestikterdiń qyzmetimen tanystyrýdy kózdeıdi. Táýelsizdik alǵaly beri baýyrlas halyqtar dostyq pen kelisim jaǵdaıynda ómir súrip keledi. Bizde jeksenbilik mektepter qyzmeti damýda, ol bizdiń etnosqa óz mádenıetimizdi, salt-dástúrlerimizdi saqtaýǵa múmkindik beredi. Menińshe, memlekettiń qamqorlyǵy degen osy», - dep atap kórsetti qyrǵyz etnomádenı birlestiginiń tóraǵasy, QHA múshesi Shavkat Ismaılov.