Astanada kezekti azyq-túlik jármeńkesi ótip jatyr

ASTANA. QazAqparat - Elordada aýyl sharýashylyǵy jármeńkeleriniń maýsymy jalǵasyp jatyr. Onda qala turǵyndary azyq-túlikti naryq baǵasynan tómen baǵada satyp ala alady. Bul joly taýarlardy Shyǵys Qazaqstan jáne Abaı oblystarynyń óndirýshileri ákeldi, dep habarlaıdy QazAqparat ákimdiktiń resmı saıtyna silteme jasap.

Jármeńke «Astana-Arena» stadıonynyń janyndaǵy alańda ótedi. Munda óńirlerden kelgen óndirýshiler 70-ten astam ónim túrlerin usynǵan.

Elordadaǵy jármeńkege barlyǵy 282 tonna azyq-túlik ákelindi.

Bul qala turǵyndaryna qolaıly baǵamen kartop pen kókónis, et, balyq, qus eti, shujyq ónimderi, bal, kúnbaǵys maıy, baqsha daqyldary, sút ónimderi, qymyz jáne panta ónimderin satyp alýǵa múmkindik beredi.

Jármeńkede ulttyq taǵamdar da bar.

«Maǵan mundaı jármeńkeler unaıdy. Munda árqashan jańa ónimder bodady, al satýshylardyń ózderi óte sypaıy jáne meıirimdi. Ózim ShQO týmasymyn. Sondyqtan, búgin óz óńirimnen taýar satyp alǵanyma óte qýanyshtymyn», - deıdi elorda turǵyny Ásemgúl Ospanova.

Aıta ketý kerek, jármeńkege kelýshilerdiń azyq-túlik qaýipsizdigi úshin alańdamaýyna bolady.

Barlyq taýar óndirýshilerde satylatyn ónimniń shyǵý tegi men tıisti sapasyn rastaıtyn qujattar bar.

Saýda jasaýdan bólek, aýylsharýashylyq jármeńkesiniń qonaqtary kontserttik baǵdarlamany tamashalaı alady. Kóbisi balalarmen birge keledi.

«Demalys kúnderin biz ádette otbasymyzben ótkizemiz. Búgingi kún de solaı ótti. Jármeńkege áıelim men qyzym úsheýmiz keldik. Jalpy, mundaǵy atmosfera unaıdy. Biz azyq-túlikti arzan baǵamen satyp aldyq, al qyzym júgirip, taza aýada bıledi. Barlyǵymyz rıza bolyp qaıtyp baramyz, osyndaı is - sharany uıymdastyrǵany úshin rahmet», - dep óz áserin bólisti Nurbol Álimjan.

Esterińizge sala keteıik, kelesi demalys kúnderi, 8-9 qazanda jármeńkede Soltústik Qazaqstan jáne Aqtóbe oblystarynyń kásipkerleri óz ónimderin usynady.

Foto: gov.kz