Astanada Kedendik baqylaý departamentinde brokerlik kompanııalardyń qatysýymen keńes ótti

ASTANA. 22 jeltoqsan. QazAqparat /Jasulan Amanbaıuly/ - Astanadaǵy Kedendik baqylaý departamentinde Indýstrııalandyrý kartasy baǵdarlamasynyń qatysýshylaryna jáne brokerlik kompanııa basshylaryna Kedendik odaq aıasynda taýarlar men kólik quraldaryn kedendik rásimdeýden ótkizý máseleleri túsindirildi.

Kedendik baqylaý departamenti janyndaǵy kedendik saıasat jónindegi qoǵamdyq kosýltatıvtik keńestiń otyrysy aǵymdaǵy jyly birneshe ret ótkizilgen bolatyn. Oǵan departament qyzmetkerlerinen bólek, «Nur Otan» HDP elordalyq fılıalynyń, keden isi salasyndaǵy syrtqy ekonomıkalyq qyzmet qatysýshylarynyń ókilderi engen.

«Memleket basshysy Nursultan Nazarbaev óziniń Joldaýlarynda ekonomıkalyq ósimniń jáne halyqtyń ál-aýqaty joǵarylaýynyń negizi bolyp tabylatyn Qazaqstannyń Indýstrııalandyrý kartasy baǵdarlamasynyń oryndaý baǵytyndaǵy sharalarǵa basa nazar aýdarady», - dedi «Astana-kedendik rásimdeý ortalyǵy» kedendik beketiniń bas mamany Erlan Qanafın.

Onyń aıtýynsha, bıyl Kedendik odaqqa múshe memleketterdiń ortaq kedendik zańnamasyna sáıkes, óndiristik bıznes obektileriniń taýarlaryn rásimdeý baǵytynda birqatar jeńildikter jasaldy. Qazan aıynan bastap, KO keńistiginde taýarlardyń enýin jáne ımporttalýyn, kedendik rásimdelýin jeńildetýdi kózdeıtin zańdaǵy ózgerister men tolyqtyrýlar kúshine endi.

Keńes barysynda brokerlik kompanııa basshylaryna, Indýstrııalandyrý kartasy jobasyna kiretin taýar óndirýshilerdiń jetekshilerine jańa ózgerister men tolyqtyrýlar týrasynda talqylaýlar men túsindirme baıandamalar jasaldy.