Astanada «Qazaqstannyń 100 jańa esimi» jeńimpazdarynyń fotokórmesi ashyldy

ASTANA. QazAqparat - Astanadaǵy «Kerýen» oıyn-saýyq ortalyǵynda «Qazaqstannyń 100 jańa esimi» jobasynyń jeńimpazdary týraly «Elimizdiń jańa esimderi» atty fotokórme ashyldy, dep habarlaıdy «QazAqparat» HAA tilshisi.

Naýryz aıynyń 17-nen bastalǵan kórme «Kerýen» oıyn-saýda ortalyǵynda 4 kún boıy jalǵasatyn bolady. Ulystyń uly kúni qarsańyndaǵy is-shara Memleket basshysynyń «Bolashaqqa baǵdar: Rýhanı jańǵyrý» baǵdarlamasynyń «Qazaqstannyń 100 jańa esimi» jobasy aıasynda uıymdastyrylyp otyr. Kórmede atalǵan jobadaǵy jeńimpazdardyń sýretteri men olardyń eńbegi jaıly málimet kórsetilgen.
 

«Naýryz meıramy qarsańynda qazaqstandyqtarǵa osyndaı bir syı jasaǵymyz keldi. Sebebi, Ulystyń uly kúni elimizdiń ár túkpirinen otandastarymyz keledi. Dál sol tusta osy kórmede biri kórshisin, biri týysyn kórip qalsa, álbette, bul olarǵa keremet kóńil-kúı syılar degen senimdemiz. Júz jańa esimniń jeńimpazdary basqa elden kelgen batyrlar emes - ózimizdiń aramyzda júrgen tulǵalar», - deıdi «Qazaqstan 100 jańa esimi» jobasynyń ókili Mahabbat Esen.
 

Atalǵan fotokórmedegi sýretter 2017 jyldyń 1 jeltoqsanynda joba jeńimpazdarynyń basyn biriktirgen forýmda, Elbasynyń joba jeńimpazdarymen kezdesýi barysynda kórsetilgen bolatyn.

Aıta ketsek, «Qazaqstannyń 100 jańa esimi» 2017 jyly Elbasy Nursultan Nazarbaevtyń bastamasy boıynsha halyqqa keńinen tanylmaǵan, alaıda belgili bir salada aıtýly jetistikke jetken azamattardyń eńbegin dáripteý maqsatynda júzege asyrylǵan. Báıgege elimizdiń túkpir-túkpirinen ár túrli saladaǵy mamandar qatysyp, eń myqty dep tanylǵan 100 adam ashyq onlaın daýys berý arqyly iriktelip alynǵan bolatyn.