Astanada Qazaqstan men Qyrǵyzstannyń parlament spıkerleri kezdesti
Kezdesý barysynda QR Parlamenti Senatynyń tóraǵasy Máýlen Áshimbaev qazaq-qyrǵyz baýyrlastyǵy ǵasyrlarmen ólshenetinin jáne búginde ózara baılanys kópke úlgi ekenin aıtty jáne Alataýdyń bókterin qatar jaılaǵan egiz halyq bolashaqqa birge qadam basa beretinin tilge tıek etti.
Sonymen qatar Senat tóraǵasy qos halyqtyń dostyǵy men baýyrlastyǵyn nyǵaıtýda tarıhı, rýhanı, mádenı-ádebı baılanystardyń orny bólek ekenin atap ótti.
Bul rette zııaly qaýym ókilderiniń úlken ról atqaratyny da aıtyldy.
«Qazaq-qyrǵyz ıntellıgentsııasynyń ózara baılanysy tereńnen tamyr tartady. Muhtar Áýezov pen Shyńǵys Aıtmatovtyń aǵalyq-inilik baýyrlastyǵy qos el zııalylarynyń talaı býyny úshin ozyq úlgi ekeni anyq. Muhań qyrǵyz ultynyń uly murasy – «Manasty» saqtaýǵa jáne tanytýǵa sheshýshi úles qosty. Shyńǵys Aıtmatovtaı ádebı juldyzdyń jarqyraı kórinýinde de Áýezovtiń qoltańbasy bar. Sol baılanystar búginde óz deńgeıinde jalǵasyp keledi. Oǵan dástúrli túrde ótkizilip kele jatqan qazaq-qyrǵyz zııalylarynyń forýmy dálel», – dedi Máýlen Áshimbaev elordadaǵy Dostyq úıinde ótken kezdesýde.
Sondaı-aq, Shyńǵys Aıtmatovtyń 95 jyldyǵyna oraı jazýshynyń ómiri men shyǵarmashylyǵyna arnalǵan kórme ashyldy.
Palata spıkeri bıyl qańtar aıynda Bishkek qalasynda ótken jetinshi forým Shyńǵys Aıtmatovtyń 95 jyldyǵyna arnalǵanyn nazarǵa alyp, álemge áıgili klassıktiń qazaq ádebıeti men rýhanııatynda da orny bólek ekenin aıtty.
Aıtmatovtyń shyǵarmalaryndaǵy oqıǵalardyń biraz bóligi qazaq dalasynda ótkeni belgili.
Jazýshynyń ózi de qazaq halqymen jáne onyń zııaly qaýymymen tyǵyz aralasyp, olarǵa úlken qamqorlyq kórsetkeni kópke málim.
«Qazaq halqy Shyńǵys Aıtmatovty óz perzentindeı jaqsy kóredi. Osyǵan oraı uly jazýshynyń mereıtoıyn Qazaqstan tarapy da nazardan tys qaldyryp otyrǵan joq. Sonyń bir dáleli búgin ótip otyrǵan uly jazýshynyń ómiri men shyǵarmashylyǵyna arnalǵan kórme ekeni sózsiz. Qazaq pen qyrǵyzǵa ortaq tulǵalardy dáripteý arqyly biz qarym-qatynasymyzdy odan ári nyǵaıtamyz. Sondyqtan bul baǵyttaǵy jumystardyń júıeli jalǵasqany asa mańyzdy», – dedi ol.
Óz kezeginde Jogorký kenesh tóraǵasy baýyrlas eki halyqtyń mádenı jáne rýhanı baılanysyn odan ári nyǵaıtýǵa qyrǵyz tarapy da múddeli ekenin jetkizdi.
«Qazaq pen qyrǵyz arasyndaǵy bekem dostyq pen birtýǵandyq kóptegen jyr-dastandar men shyǵarmalarǵa arqaý bolǵanyn bilemiz. Osyndaı qarym-qatynas bizdiń zııalylarymyz arasynda berik saqtalyp keledi. Qyrǵyzdyń «Manas» jyrynyń búginge jetýinde qazaqtyń zańǵar jazýshysy Muhtar Áýezovtyń róli zor. Osy oraıda qyrǵyzdyń birtýar perzenti Shyńǵys Aıtmatovtyń 95 jyldyǵy Qazaq elinde de keń kólemde atalyp ótip jatqanyna aıryqsha alǵysymyzdy bildiremiz», – dedi Nurlanbek Shakıev.
Kezdesýde Máýlen Áshimbaev Qazaqstan halqy Assambleıasynyń qyzmetine jáne onyń elimizdegi jalpyulttyq birlik pen qoǵamdyq kelisimdi saqtaýdaǵy róline keńinen toqtaldy.
Sondaı-aq jıynda Qazaqstanda 40 myńnan astam qyrǵyz etnosynyń ókili turatyny jáne Assambleıa aıasynda 10 óńirlik qyrǵyz etnomádenı birlestigi jumys isteıtini aıtyldy.