Astanada Qazaqstan-Qyrǵyzstan úkimetaralyq keńesiniń kezekti otyrysy ótti
Úkimetaralyq keńes otyrysy aıasynda Qazaqstan Premer-Mınıstri Baqytjan Saǵyntaev pen Qyrǵyzstan Premer-Mınıstri Mýhammedkalyı Abylgazıevtiń ekijaqty kezdesýi ótti. Taraptar saýda-ekonomıkalyq yntymaqtastyqtyń ózekti máselelerin, ınvestıtsııalyq ózara is-qımyldy keńeıtýdiń jáne tranzıttik-kólik, sý-energetıka, týrızm jáne ózge de salalardaǵy birlesken jobalardy iske asyrýdyń aldaǵy josparlaryn talqylady.
VII otyrys barysynda Qazaqstan-Qyrǵyzstan úkimetaralyq keńesiniń VI otyrysynyń hattamasyn oryndaý qorytyndylary shyǵarylyp, saýda, kólik, ınvestıtsııalar, energetıka, aýyl sharýashylyǵy, sondaı-aq týrızm men tsıfrlandyrý salalaryndaǵy yntymaqtastyqtyń aldaǵy kezeńderi qaraldy. Budan ózge, Qazaqstan men Qyrǵyzstan yntymaqtastyǵynyń 2018-2020 jyldarǵa arnalǵan keshendi baǵdarlamasy qaraldy.
Otyrysty ashqan Baqytjan Saǵyntaev Qazaqstan Prezıdenti Nursultan Nazarbaev pen Qyrǵyzstan Prezıdenti Sooronbaı Jeenbekov arasyndaǵy ózara syılastyq, dostyq qarym-qatynas eki el arasyndaǵy baılanystardy jańa sapaly deńgeıge kóterip, ejelden «aýyly aralas, qoıy qoralas» halyqtarymyz arasyndaǵy dostyq pen ózara túsinistikti nyǵaıtýǵa múmkindik bergenin atap ótti.
Eki memlekettiń saýda-ekonomıkalyq qatynastarynda oń qarqyn baıqalady. 2017 jyly ózara saýda 13,4%-ǵa artty, al 2018 jylǵy bes aıdyń qorytyndysy boıynsha ósim 9,8% qurady.
Indýstrııalandyrý jyldary QR-da jańa óndiristik qýattylyqtar paıda boldy, syrtqy naryqtarǵa tabyspen shyǵarylyp jatqan ónimderdi óndirý alýandyǵy ulǵaıdy. Qazaqstandyq óndirýshilerdiń metallýrgııa ónimderin, azyq-túlik ónimderin, dári-dármekterdi, qurylys materıaldaryn, sondaı-aq tsıfrlandyrý ónimderin eksporttaýǵa áleýetti múmkindikteri bar.
«Búgingi tańda Qazaqstanda kóterme jáne bólshek saýda, óńdeý ónerkásibi, kásibı, ǵylymı jáne tehnıkalyq qyzmet, qurylys jáne qyzmet kórsetý salalarynda jumys isteıtin 824 birlesken kásiporyn bar. Budan ózge, ekonomıkanyń basym sektorlaryna sheteldik ınvestorlardy tartý maqsatynda «Kazakh Invest» ulttyq kompanııasy Deloitte kompanııasymen birlesip, qyrǵyz tarapyna qatysýǵa bolatyn «50 taýashaly joba» daıyndady. Álbette, ózara saýda aınalymyn $1 mlrd deıin ulǵaıtý jónindegi josparlardy is júzine asyrýǵa bolady», - dedi Premer-Mınıstr.
Otyrys barysynda 2017 jylǵy 2 jeltoqsanda Astanada qol qoıylǵan Ekijaqty ekonomıkalyq yntymaqtastyq máseleleri jónindegi jol kartasynyń tarmaqtaryn oryndaý jumystarynyń nátıjeleri atalyp ótti. Jol kartasynyń tolyqtaı iske asyrylýy saýda-ekonomıkalyq yntymaqtastyqtyń basty basymdyǵy, bul eki el arasyndaǵy ózara saýda-sattyqty keńeıtýge jol ashady, al jaqynda qurylǵan Qazaqstan-Qyrǵyzstan iskerlik keńesi alǵa qoıylǵan mindetterdi sheshý jolynda utymdy quraldardyń birine aınalýy tıis. Osy jyldyń sońyna deıin Іskerlik keńestiń І otyrysyn ótkizý, sondaı-aq, qazaqstandyq eksportshylardyń Qyrǵyzstanǵa saýda-ekonomıkalyq mıssııayn ótkizý josparda bar.
Taraptar áskerı-tehnıkalyq yntymaqtastyqty damytý, transshekaralyq sýdy paıdalaný salasyndaǵy ózara is-qımyldy damytý máselelerin talqylady. Sondaı-aq, otyrys barysynda Qazaqstan-Qyrǵyzstan memlekettik shekarasynda ózara is-qımyldy damytý keleshegi qaraldy. 2017 jylǵy 25 jeltoqsanda qol qoıylǵan Demarkatsııa týraly kelisimshart pen Memlekettik shekaralar rejımi týraly kelisim ratıfıkatsııalaýǵa berilgen.
«Qyrǵyz tarapynyń usynysy boıynsha «Sartóbe» (Toqmaq) jáne «Aýqatty» (Keńbulyn) ótkizý pýnkteriniń mártebesin ózgertý týraly hattamaǵa ekijaqtydan kópjaqty retinde qol qoıýǵa daıynbyz. Bul olardyń ótkizý qabiletin ulǵaıtýǵa múmkindik beredi. Sonymen qatar, atalǵan sheshimdi oryndaý osy ótkizý pýnkteriniń jáne olarǵa aparatyn kirý joldarynyń ınfraqurylymyn qosymsha jańǵyrtýdy talap etetinin túsinemiz. Shekaranyń joǵary sapaly qyzmet kórsetýin qamtamasyz etý - basym mindetterdiń biri», - dedi QR Premer-Mınıstri.
Óńirlik týrıstik baǵyttardy damytý ózara árekettestikte áleýeti mol taǵy bir baǵyt bolyp tabylady. Ózara tıimdi yntymaqtastyqtyń kórnekti mysaly eki eldiń aýmaǵy arqyly ótetin Han Táńiri shyńyna týrıstik baǵyttardyń ashylýy bola alady.
Óz kezeginde Qyrǵyzstan Premer-Mınıstri M. Abylgazıev baıandamasynda saýda, kólik, tranzıttik jáne týrıstik salalardaǵy yntymaqtastyq máselelerine toqtaldy. EAEO-tyń biryńǵaı tsıfrlyq kún tártibiniń negizinde ekonomıkany tsıfrlyq transformatsııalaý aıasynda ózara is-qımyl áleýetin atap ótti. Sonymen qatar M. Abylgazıev salyqtyq ákimshilendirýdi, taýarlardyń sáıkestigi men olardy tańbalaýdy jetildirý máselelerin qozǵady.
Otyrys qorytyndysy boıynsha birqatar qujattarǵa qol qoıý rásimi ótti. Eki eldiń Premer-Mınıstrleri deńgeıinde Qazaqstan-Qyrǵyz úkimetaralyq keńesiniń VII otyrysynyń hattamasyna qol qoıyldy. Sonymen qatar Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy 2003 jylǵy 25 jeltoqsandaǵy memlekettik shekara arqyly ótkizý pýnktteri týraly Kelisimge jáne Qyrǵyz Respýblıkasynyń Ekonomıka mınıstrligi men Qazaqstan Respýblıkasynyń Ulttyq ekonomıka mınıstrligi arasyndaǵy yntymaqtastyq týraly Memorandýmǵa ózgerister engizý týraly Hattama qabyldandy.
Qazaqstan-Qyrǵyzstan Úkimetaralyq keńesiniń kelesi VIII otyrysy 2019 jyly Bishkek qalasynda ótedi.