Astanada Qazaqstan halqy Assambleıasynyń jyly qarsańynda keń aýqymdy mádenı is-sharalar ótedi

ASTANA. QazAqparat - Bıylǵy 2015 jyl Qazaqstan halqy Assambleıasynyń jyly dep jarııalandy. Assambleıanyń qurylǵanyna 20 jyl tolýynyń qurmetine búkil Qazaqstan boıynsha keń aýqymdy is-sharalar ótkizý josparlanǵan, dep habarlaıdy elorda ákimdiginiń baspasóz qyzmeti.

Qala turǵyndary men qonaqtary úshin etnomádenı birlestikterdiń qatysýymen kóptegen qyzyqty is-sharalar daıyndalýda. Mereıtoılyq jyldyń saltanatty ashylýy 6 aqpanda Beıbitshilik jáne kelisim saraıynda ótedi. «Beıbitshilik jáne kelisim jol kartasy» mega-jobasynyń qorytyndysy shyǵarylyp, etnomádenı birlestikterdiń «Meniń Qazaqstanym» qalalyq mýzykalyq festıvali uıymdastyrylmaq.

Elordalyq murajaılar men mádenıet mekemelerinde jyl boıy Qazaqstandaǵy beıbitshilik pen toleranttylyqty saqtaý, kóp ultty memleketimizdi nyǵaıtý uranymen etnofestıvaldar, patrıottyq keshter men taqyryptyq kórmeler ótkiziledi.

Astanalyq mektep oqýshylary beıbitshilik jáne kelisim sabaqtaryna qatysyp, balalar shyǵarmashylyǵy baıqaýlary men memlekettik tildi bilý saıystarynda jarysqa túsedi.

Sondaı-aq, qalalyq mektepter men JOO mádenı birlestikterdiń kúnderi ótedi. Bıyl elorda kúni «Astana beıbitshilik jáne kelisim qalasy» uranymen atalyp ótiledi, sonyń aıasynda qalalyq etnomádenı birlestikterdiń qatysýymen merekelik is-sharalar uıymdastyrylady.

Eske sala keteıik, Astanada 100 astam ult ókili turady, 46 jýyq etnomádenı birlestik belsendi qyzmet etedi.