Astanada qazaq teatry salynady

ASTANA. QazAqparat - Astanada qazaq teatrynyń qurylysy josparlanýda. Bul týraly Feısbýkte qala basshysynyń baspasóz hatshysy Elvıra Júrgenbaeva jazdy.

«Elordamyzda qazaq teatry salynbaq. Bul Astana qalasy ákimdiginiń Elbasy jarııalaǵan "Bolashaqqa baǵdar: Rýxanı jańǵyrý" maqalasyn iske asyrýdaǵy jobalarynyń biri ǵana», - dep jazdy ol.

Ol QazAqparat tilshisine jańa teatrdyń Astana ákimdiginiń qatysýymen ótken jınalysta usynylǵanyn naqtylap aıtty.

«Ákim Prezıdent maqalasyn júzege asyrý boıynsha naqty tapsyrmalar berdi. Ár basqarma óz jobasyn tanystyrdy. Bul - kóp jobanyń biri ǵana. Mundaı jobalar jastar, bilim berý salalarynda óte kóp usynyldy», - dep atap ótti ol.

Elordanyń mádenıet basqarmasynyń saıtynda jarııalanǵan deregi boıynsha, Astanada qazirgi tańda alty teatr bar.