Astanada «Qazaq kınosynyń aptalyǵy» bastaldy

ASTANA. 10 jeltoqsan. QazAqparat - «Qazaq kınosynyń aptalyǵy»  aıasynda osy jyly túsirilgen otandyq kórkem jáne derekti fılmder qala turǵyndary men qonaqtaryna tegin kórsetiletin bolady.

Bul týraly búgin Astanada Sháken Aımanov atyndaǵy «Qazaqfılm» AQ prezıdenti Ermek Amanshaev málim etti.

«Aldaǵy 5 kún boıy biz aǵymdaǵy jyly Qazaqstanda túsirilgen jańa fılmderdiń arnaıy kórsetilimin jasaımyz. Sonymen qatar, jas rejısser Ahat Ybyraevtyń otandyq kıno tarıhynda tuńǵysh fentezı janrynda túsirilgen «Ańyzdar kitaby. Ǵajaıyp orman» fılminiń tusaýkeserin ótkizip, «Er Tóstik pen Aıdahar» atty qazaqtyń tuńǵysh tolyqmetrajdy anımatsııalyq fılmin jurt nazaryna usynatyn bolamyz», - dep atap ótti E.Amanshaev.

Onyń atap ótkenindeı, aptalyq aıasynda Turar Rysqulov, Májit Begalın, Ábish Kekilbaev, Asanáli Áshimov syndy basqa da kórnekti qoǵam qaıratkerleriniń ómiri men shyǵarmashylyǵyna arnalǵan Sháken Aımanov atyndaǵy «Qazaqfılm» AQ shyǵarǵan derekti fılmderdi de kórsetý josparlanyp otyr.

«Barlyq fılmderdi sol týyndyny túsirgen rejısser men shyǵarmashylyq ujym tanystyryp otyrady. Otandyq kınoındýstrııanyń qazirgi adymy men damý deńgeıi qatty qýantady. Túrli janrlarda, taqyryptarda kóptegen fılmder jaryqqa shyqty. Kınoteatrlardyń sany artýda, qarjylandyrý júrip jatyr, bunyń barlyǵy - damý qarqynyn údete tústi», - dedi E.Amanshaev.

QR Táýelsizdigi kúnine oraılastyrylǵan «Qazaq kınosynyń aptalyǵy» 10-15 jeltoqsan aralyǵynda Astanada ótedi. Onda «Armandastar» (rejısseri Erlan Saǵynov), «Ańshy bala» (rejısserler Erlan Nurmuhambetov jáne Begarys Elýbaı), «Shal» (rejısseri Ermek Tursynov), «Lotereıa» (rejısseri Dámir Manabaı), «Jaýjúrek myń bala» (rejısseri Aqan Sataev) kórkem fılmderin kórsetý josparlanǵan.

Kórsetilimder «Kerýen» saýda ortalyǵyndaǵy «Kınopark-7» kınoteatrynda ótedi. Kirý - tegin.