Astanada qazaq halqynyń kóne qolóner kórmesi ótedi

ASTANA. 28 naýryz. QazAqparat - Búgin Astanada «Altyn jáne baǵaly metaldar memlekettik murajaıynda» tanymal kollektsıoner-etnograf, zergerlik óneriniń has sheberi - sýretshi E. Daýbaev jınaǵynyń «Qazaq halqynyń kóne qolóner kórmesi» atty sándik-qoldanbaly óner kórmesi ashylady.

Bul týraly QR Mádenıet jáne aqparat mınıstrliginiń baspasóz qyzmei habarlady.

Bul mádenı sharany atalǵan mınıstrliktiń Mádenıet komıtetimen birge «Altyn jáne baǵaly metaldar memlekettik murajaıy respýblıkalyq mekemesi, «Nazaraev ortalǵy» memlekettik mekemesi birlesip uıymdastyryp otyr.

Murajaı kórermenderi nazaryna qazaq halqynyń XVIII-XX ǵasyrlardaǵy zergerlik buıymdary, bas kıimderi, er-turman, qarý-jaraq jáne turmystyq buıymdary usynylady. Zergerlik jáne sándik-qoldanbaly óner buıymdarynyń qaı-qaısysy bolmasyn qazaq halqynyń tarıhymen tyǵyz baılanysty bola otyryp, qaınar bulaǵy myńjyldyqtardan bastaý alatyn ulttyq mádenıetimizdiń damý jolynyń aınasy ispettes.

Halqymyzdyń ulttyq áshekeıleri - zergerlik óner sheberleriniń baǵa jetpes úzdik týyndylary bolyp tabylady: olardy ásemdik úshin ǵana emes, tylsym kúshterden qorǵaný úshin de taǵynatyn. Áshekeı buıymdardyń pishini men oıý-órnegi ǵana emes, sonymen qatar materıaly da aıryqsha mán-maǵynaǵa ıe. Materıaldar men ony kómkerýshi tastardy tańdaǵanda olardyń tabıǵı ásemdigimen qatar emdik qasıetterine basa nazar aýdarylǵan.

Babalarymyzdyń urpaqtan-urpaqqa mura bolyp qala otyryp, bizge jetken baı mádenı murasy Elbasymyz Nursultan Nazarbaev bastamasymen júzege asyrylyp otyrǵan «Mádenı mura» memlekettik baǵdarlamasy aıasynda zerttelip, qaıta jańǵyrtylýda.

Kórme 28 naýryz ben 5 mamyr aralyǵynda jumys isteıdi.