Astanada Qazaq drama teatrynyń ǵımaraty qashan salynady

ASTANA. QazAqparat - Astanadaǵy Q.Qýanyshbaev atyndaǵy memlekettik akademııalyq qazaq mýzykalyq drama teatrynyń jańa ǵımaraty salynady. Bul 2018 jyly Astana qalasynyń 20 jyldyǵy aıasynda júzege aspaq, dep habarlaıdy QazAqparat tilshisi.

Bul týraly QR Parlamenti Májilisinde ótken Úkimet saǵatynda QR Mádenıet jáne sport mınıstri Arystanbek Muhamedıuly aıtty.

«Osydan biraz jyl buryn Astanadaǵy Q.Qýanyshbaev atyndaǵy qazaq teatry qurylysy týraly Úkimetke bergen saýalyma oń jaýap alyp edim. Sol teatr úıi qashan, qaı jerde salynady?", - dep suraq qoıdy Mádenıet jáne sport mınıstrine Májilis depýtaty Qýanysh Sultanov.

«Jaqynda ǵana Elbasy Astana bas josparyna barǵanda,  Qýanyshbaev teatryna jańa ǵımarat salý máselesi qaralǵan edi. Jańa ǵımarat qurylysynyń jumysy Samuryq Qazyna aktsıonerlik qoǵamyna júkteldi. Belgilengen jeri alǵashynda Aqordanyń art jaǵyndaǵy etnopark bolatyn. Biraq halyqtyń kelýine yńǵaısyzdyǵy men avtokólikterge joldyń qajettiligi eskerilip, basqa jer qarastyrylyp jatyr. Astananyń 20 jyldyq merekesi sharasynda alǵashqy qurylys kapsýlasy mindetti túrde qaǵylady», - dep jaýap berdi mınıstr.

Aıta keteıik, 25 jyldan astam tarıhy bar elordalyq Qallekı teatrynyń jańa ǵımaraty máselesi birneshe jyldan beri sheshilmeı keledi.