Astanada qaza tapqan órt sóndirýshi Asqar Zabıkýlınge kóshe aty berildi

ASTANA. QazAqparat – Astanada erlikpen qaza tapqan órt sóndirýshi Asqar Zabıkýlın esimi jańa kóshege berildi. Máslıhat depýtattary sheshimdi biraýyzdan qoldady, dep habarlaıdy QazAqparat tilshisi.

Máslıhattyń búgingi otyrysynda Astana qalasynyń keıbir quramdas bólikterine ataýlar berý máselesi qaraldy.

«Onomastıka komıssııasynyń otyrysynda birneshe máseleni qarastyrdyq. Olardyń birinshisi Qoǵamdyq keńesterde, Máslıhat otyrystarynda talqylandy. Biz ál-Farabı dańǵylyn elordanyń sol jaǵalaýyndaǵy №38 kóshege aýystyrýdy uıǵardyq. Bul kópjolaqty kóshe, Táýelsizdik dańǵylynyń jalǵasy bolyp tabylady. Bolashaqta ol úlken dańǵyldardyń birine aınalady. Taǵy bir usynys – ózderińiz biletindeı, «Qaharman» turǵyn úı kesheninde órt boldy. Órt sóndirýshi Asqar Zabıkýlın qyzmettik boryshyn oryndaý kezinde qaza tapty. Memleket basshysy elordalyq kóshelerdiń birin Asqar Zabıkýlınniń esimimen ataýdy tapsyrdy. Osylaısha, «Úrker» turǵyn alabyndaǵy №583 kósheni qutqarýshy Asqar Zabıkýlınniń esimimen ataýdy usynamyz», - dedi máslıhat otyrysynda elordalyq tilderdi damytý jáne muraǵat ýpravlenııa basqarmasynyń basshysy Sáken Esirkep.

Spıkerdiń aıtýynsha, osy kóshe janynda qyzmettik boryshyn óteý kezinde qaza tapqan Saıat Ábeev pen Ǵazız Baıtasov atyndaǵy kósheler qatar ornalasqan.

Eske sala keteıik, elordada kópqabatty úıde órt bolyp, 3 adam, onyń ishinde bir bala aýrýhanaǵa tústi. Al, 3 adamdy qutqarǵan órt sóndirýshi Asqar Zabıkýlındi 80% kúıik shalyp, jansaqtaý bólimine jatqyzyldy. Oǵan dostary kómek jınady.

Memleket basshysy erlik kórsetken jáne birneshe adamnyń ómirin qutqarǵan elordalyq órt sóndirýshilerdi Qazaqstan Respýblıkasynyń memlekettik nagradalarymen marapattaý týraly Jarlyqqa qol qoıdy.

Foto: instagram.com/askar_zn