Astanada Qaırat Boranbaevtyń nemere inisi sottaldy
Habarlamada aıtylǵandaı, 2023 jylǵy 19 qazanda Astana qalasynyń qylmystyq ister jónindegi aýdanaralyq soty B-nyń (Ábilhan Boranbaev) laýazymdy tulǵalarǵa para berý faktisi boıynsha (Qylmystyq kodekstiń 367-baby 2-bóligi) jáne Q-nyń quqyq qorǵaý organynyń laýazymdy qyzmetkeri bola tura para alý faktisi boıynsha (Qylmystyq kodekstiń 366-baby 3-bóligi 2) tarmaǵy) qatysty qylmystyq is qozǵady.
B. aǵa jedel ýákili Q. men Sh.-ǵa (tergeý kezinde qaıtys bolýyna baılanysty is toqtatyldy) jalpy somasy 1,6 mln teńgeden astam para bergen degen aıyp taǵylyp otyr. Óz kezeginde Q. jáne Sh., adamdarmen aldyn ala sóz baılasý arqyly para alǵan.
Prokýror aıyptaýdy qoldap, sottalýshyǵa B.-ǵa 4 jyl 6 aı merzimge, al sottalýshy Q.-ǵa 7 jyl merzimge bas bostandyǵynan aıyrý jazasyn taǵaıyndaýdy surady. Al qorǵaýshy tarap B. jáne Q.-ǵa Qylmystyq kodekstiń 55-babynyń 4-bóligine sáıkes aıyppul túrinde jaza taǵaıyndaýdy surady.
«Sottalýshylardyń kinási kýágerlerdiń aıǵaqtarymen, banktik málimetterimen, betpe-bet kezdestirýlermen, saraptamalardyń qorytyndylarymen, beınekamera jazbalarymen, oqıǵa bolǵan jerdi qaraý hattamasymen jáne qylmystyq istiń basqa da materıaldarymen dáleldendi», - deıdi qalalyq sottan.
Sot B.-nyń 4 jas balasy baryn, kinásin moıyndaýyn, shyn júrekten ókinýin, qylmystyq quqyq buzýshylyqty ashýǵa jáne qylmystyq quqyq buzýshylyqtyń basqa da qatysýshylaryn áshkereleýge belsendi yqpal etkenin, al Q.-nyń 3 jas balasynyń baryn, kinásin moıyndaýyn jáne shyn júrekten ókinýin qylmystyq jaýaptylyq pen jazany jeńildetetin jaǵdaı retinde tanydy. Sottalýshylardyń qylmystyq jaýaptylyq pen jazasyn aýyrlatatyn mán-jaı anyqtalǵan joq.
Qylmystyq kodekstiń 367-baby 2-bóligi sáıkes múlik tárkilenip, laýazymdy qyzmet nemese belgili bir qyzmetpen aınalysý quqyǵynan ómir boıyna aıyra otyryp, paranyń 30-dan 40 eselengenge deıingi somasy mólsherinde aıyppul salyp, 3 jyldan 7 jylǵa deıingi merzimge bas bostandyǵynan aıyrý jazasyn kózdeıdi.
«Sot úkimimen B. Qylmystyq kodekstiń 367-babynyń 2-bóligine sáıkes qylmystyq quqyq buzýshylyq jasaǵany úshin kináli dep tanylyp, memlekettik qyzmette jáne kvazımemlekettik sektorda laýazymdardy atqarý quqyǵynan ómir boıyna aıyryla otyryp, 4 jyl 6 aıǵa bas bostandyǵynan aıyryldy. Al Q. Qylmystyq kodekstiń 366-baby 3-bóligi 2) tarmaǵynda kózdelgen qylmystyq quqyq buzýshylyq jasaǵany úshin kináli dep tanylyp, oǵan memlekettik qyzmette jáne kvazımemlekettik sektorda qyzmet atqarý quqyǵynan ómir boıyna aıyra otyryp, 7 jyl merzimge bas bostandyǵynan aıyrý túrindegi jaza taǵaıyndaldy», - delingen qalalyq sottyń habarlamasynda.
Úkim zańdy kúshine engen joq.