Astanada «Qasıetti qazaq eli» halyqaralyq óner festıvali ótip jatyr
Óner festıvaline elimizdiń túkpir-túkipirinen kelgen otandastarymyzdan bólek, Germanııa, Frantsııa, Mońǵolııa, Reseı, Qytaı jáne taǵy basqa elderden 50-ge jýyq ónerpazdar qatysýda.
Shyǵarmashylyq sharanyń maqsaty - qandastarymyzdyń shyǵarmashylyq jáne bilim potentsıalyn arttyrý. Ana tili men ulttyq qundylyqtardy ıgerýi turǵysynda sheteldegi qazaq dıasporalaryna ádistemelik jáne uıymdastyrýshylyq qoldaý kórsetý.
«Elbasy V dúnıjúzi qazaqtarynyń quryltaıynda sheteldegi qandastarymyzǵa qoldaý kórsetetin qor quryp, qarjy jınaý kerektigin tapsyrdy. Kóp uzamaı prezıdent tapsyrmasymen «Otandastar» qory óz jumysyn bastap ketti. Búgin mine sol tapsyrmanyń aıasynda qordyń uıymdastyrýymen alǵashqy aýqymdy shara ótýde. Odan bólek, Elbasy shetel qazaqtaryna arnalǵan baǵdarlama jasańdar dedi, ol jasalyp Úkimet bekitti jáne oǵan qajetti tıisti qarjyda bólindi. Endigi maqsat - syrttaǵy qandastarymyzǵa qoldaý tanytyp, olardyń ulttyq mádenıetimiz ben dástúrdi damytýyna jaǵdaı jasaý», - dedi Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov.
Halyqaralyq óner festıvali ulttyq qoldanbaly óner, terme jáne músháıra sekildi úsh nomınatsııa boıynsha uıymdastyrylýda.
Aıta ketsek, qazir álemniń 43 elinde 5 mln-nan astam qazaq turady, olardyń deni Ózbekstan, Qytaı jáne Reseıde ómir súrýde.
«Terme janry boıynsha iri kólemdegi óner baıqaýyna alǵash ret qatysýym. Negizinen etstrada ártisimin. Buǵan deıin Qazaqstanda ótken estrada janryndaǵy baıqaýlarǵa qatysyp, júldeli oryndar ıelengenmin. Al, búgingi jarysqa 3 terme daıyndap keldim, biraq qazylar alqasynyń sheshimien tek bireýin ǵana, ıaǵnı aqyn Beken Qaıratulynyń «Qaıdan keldiń deısiń be?» termesin oryndaımyn», - deıdi Mońǵolııadan kelgen qandasymyz, termeshi Berikbol Erǵabyluly.
Buǵan deıin habarlaǵanymyzdaı, keshe elordada shetel qazaqtarynyń qatysýymen jıyn ótip, onyń barysynda «Alystaǵy aǵaıyn» derekti fılminiń tusaýy kesilgenin aıtqan bolatynbyz.