Astanada qarjy pıramıdasynyń belgileri bar kompanııa anyqtaldy

NUR-SULTAN. QazAqparat – QR Qarjylyq monıtorıng agenttiginiń Nur-Sultan qalasy boıynsha departamenti qarjy pıramıdasyn qurý jáne oǵan basshylyq etý deregi boıynsha qylmystyq isti tergeýde, dep habarlaıdy QazAqparat.

Qarjy pıramıdalary salymshylardy tartý úshin kóbinese ózderin joǵary tabysty ınvestıtsııalar salasyndaǵy uıymdar retinde kórsetedi.

Mundaı kompanııalar mıkroqarjy uıymdary, tutyný kooperatıvteri, noý-haý jobalar, zergerlik jáne ózge de kompanııalar retinde zańdy túrde tirkeledi.

QR Qarjylyq monıtorıng agenttiginiń baspasóz qyzmetinen málim etkendeı, jedel-izdestirý sharalary barysynda Nur-Sultan qalasynyń aýmaǵynda salymshylardyń qarajatyn tarta otyryp, olarǵa keminde úsh jańa salymshyny qosqan jaǵdaıda salym somasynyń 100% qaıtarýǵa ýáde etip kelgen «Best Road Investment» JShS qyzmeti anyqtaldy.

«Qazirgi ýaqytta zardap shekken adamdar men keltirilgen zalaldyń somasy anyqtalýda.

QPK-niń 201-babyna sáıkes ózge málimetter tergeý múddesine oraı jarııa etýge jatpaıdy.

Qurmetti azamattar! Eger siz nemese sizdiń jaqyndaryńyz «Best Road Investment» JShS salymshylary bolsańyz, Nur-Sultan qalasy boıynsha ETD senim telefonyna [phone] habarlasýdy suraımyz», - dedi agenttiktiń baspasóz qyzmetinen.