Astanada qarly borannan paıda bolǵan keptelis jol qozǵalysyna qalaı áser etti

<p>ASTANA. KAZINFORM - Astanada birneshe kún boıy qalyń qar jaýyp, qala kóshelerinde keptelis týdyrdy.</p>

Sergek ITS sarapshylary qar jaýmaǵan 5 qarasha men qarly boran bolǵan 11 qarasha kúnderinde joldardaǵy ortasha jyldamdyqty salystyryp kórdi.

Ádettegideı, Astanada eń kóp keptelis Turan, Qabanbaı batyr, Máńgilik El dańǵyldary men Túrkistan kóshesinde boldy.

Turaqty tyǵyzdyq tańerteńgi 8:00 men 9:00 aralyǵynda jáne keshki 18:00 men 19:00 aralyǵynda baıqaldy. Keıbir kóshelerdegi keptelister ádettegi ýaqyttan bir saǵatqa sozylyp ketti.

Mysaly, 11 qarasha kúni tańerteń Turan dańǵylynda (soltústik baǵytta) kólik jyldamdyǵy shamamen tórtten birge tómendedi, al Máńgilik El, Qabanbaı batyr dańǵyldarynda jáne Túrkistan kóshesinde jyldamdyq birden úshten birge azaıdy. Máńgilik El dańǵylyndaǵy keptelistiń shyńy tańǵy 10:00-ge kelip, ortasha jyldamdyq 27 km/saǵattan 16 km/saǵatqa deıin tómendedi.

Keshki ýaqytta eń tómengi jyldamdyq Qabanbaı batyr dańǵylynda tirkeldi. 19:00 men 20:00 aralyǵynda bul jolda ortasha jyldamdyq eki ese kemidi — ashyq aýa raıynda 23 km/saǵat bolsa, qarly boran kúni 12 km/saǵatqa deıin tómendegen.

Jalpy alǵanda, ıntellektýaldy kólik júıesiniń derekterine súıensek, júrgizýshilerdiń ortasha qozǵalys jyldamdyǵy shamamen 30%-ǵa azaıǵan. ıAǵnı, astanalyqtar ózderine qajetti jerge jetý úshin 43%-ǵa kóp ýaqyt jumsaýy kerek.

Eskerte keteıik, kúzden qysqa ótetin maýsymda jol-kólik oqıǵalarynyń jıiligi artady. Sondyqtan júrgizýshiler jyldamdyq rejımin saqtap, qaýipti manevrler jasamaǵany abzal.