Astanada «qaraly qańtar» qurbandaryna arnalǵan kórme ashyldy

ASTANA. QazAqparat - Astanada 1990 jyly Bakýde bolǵan qaıǵyly oqıǵaǵa arnalǵan «Qaraly qańtar» - Táýelsizdik jolynda» atty foto-kórme ashyldy, dep habarlaıdy QazAqparat Túrki akademııasy halyqaralyq uıymyna (TWESCO) silteme jasap.

Kórmeni TWESCO-nyń qoldaýymen Ázerbaıjan Respýblıkasynyń Qazaqstandaǵy Elshiligi uıymdastyrdy.

Sharaǵa eki eldiń memleket jáne qoǵam qaıratkerleri, dıplomattar, zııaly qaýym ókilderi qatysty.

Kórmeni ashqan Ázerbaıjan elshisi Rashad Mammadov 28 jyl buryn 20 qańtarda bolǵan oqıǵalar týraly áńgimelep, kórmeniń mańyzyna toqtaldy.

Kelýshiler nazaryna tarıhqa «qaraly qańtar» dep engen kúngi qaıǵyly jaǵdaılar men qaza tapqan qurbandardyń sýretteri usynyldy.

20 qańtar Ázerbaıjanda búkilhalyqtyq aza tutý kúni dep jarııalanǵan. Totalıtarızmniń saldarynan bolǵan qandy oqıǵalarǵa bıyl 28 jyl tolsa da ázerbaıjan halqy táýelsizdik úshin kúreste sheıit bolǵan týǵan-týystary men jaqyndaryn eske alyp, aza tutady.