Astanada qar kúreýden únemdelgen qarajat qaıda jumsalady

<p>Astana qalasynyń ákimi Jeńis Qasymbek elorda kóshelerin qardan tazartý jumystaryna kóńili tolatynyn aıtty, dep habarlaıdy <a href="Kazinform." target="_blank" rel="noopener">Kazinform.</a></p>

«Astanaǵa bıyl qar kesh jaýdy. Qar kúreý jumystary boıynsha qansha aqsha únemdeldi? Bul qarjyny qaıda jumsaýdy josparlap otyrsyzdar?», - dep suraq qoıdy tilshiler Ortalyq kommýnıkatsııalar qyzmetinde. 

«Bıyl biz 1,5 aıdyń ishinde 2 mlrd teńgeni únemdedik. Qalada sheshimin tappaǵan máseleler kóp. Mysaly, mektepter men balabaqshalar. Únemdelgen qarjy osy áleýmettik maqsattarǵa jumsalady», - dep jaýap berdi Jeńis Qasymbek.

Ákim normatıv boıynsha 72 saǵatta qar tazalaý jumystary júrýi kerektigin aıtty.

«Al turǵyndar kóp jaǵdaıda eki saǵatta qardyń tazalanǵanyn qalaıdy. Árıne, birinshi kezekte adam aǵyny kóp qalanyń ortalyq kólik magıstraldary tazartylady. Ekinshi kezekte biz kvartal ishindegi kóshelerdi, sodan keıin aýlalardy tazalaımyz. Sondyqtan aýladaǵy qardy bir kún ishinde shyǵaryp tastaý árdaıym múmkin bola bermeıdi. Biraq biz reglamentke sáıkes jumys istep kelemiz. Úsh kún buryn qar kóp jaýdy. Biraq qazir qaladaǵy jaǵdaıdy kórip otyrsyzdar, negizgi magıstraldar, kvartalishilik joldar tazartyldy. Tehnıka árdaıym jete bermeıdi. Biz keshe jáne aldyńǵy kúni qurylys kompanııalarynan qar shyǵarý úshin tehnıka aldyq. Jalpy, kommýnaldyq kompanııalar asqan jaýapkershilikpen jumys istep jatyr», - dedi Jeńis Qasymbek.