Astanada kámeletke tolmaǵan 165 jasóspirim polıtsııa bólimine jetkizildi

<p>ASTANA. KAZINFORM — Elordada jasóspirimder qylmysynyń aldyn alý jáne kámeletke tolmaǵandardyń quqyqtyq saýattylyǵyn arttyrý maqsatynda «Túngi qaladaǵy balalar» jedel aldyn alý is-sharalary júrgizilip jatyr, dep habarlaıdy Astana ákimdiginiń baspasóz qyzmeti.</p>

Polıtseıler aýdandyq ákimdikterdiń, bilim basqarmasynyń jáne Astana qalasy ákimdigi janyndaǵy Áıelder isteri jáne otbasylyq-demografııalyq saıasat jónindegi komıssııanyń qyzmetkerlerimen birlesip, saıabaqtar men gúlzarlardy, kompıýterlik klýbtardy, kafelerdi tekseredi. Tekserý barysynda kámeletke tolmaǵandardyń túngi ýaqytta zańdy ókilderinsiz oıyn-saýyq oryndarynda bolý derekteri anyqtaldy.

— Reıdtik is-sharalar sheńberinde aýdandyq ІІO-ǵa 165 kámeletke tolmaǵan jasóspirim jetkizildi, 6 bala esepke alyndy. Sonymen qatar, 151 ákimshilik quqyq buzýshylyq anyqtaldy, onyń ishinde QR ÁQBtK-niń 442-babynyń 2-bóligi «Kámeletke tolmaǵandardyń túngi ýaqytta oıyn-saýyq mekemelerinde nemese zańdy ókilderiniń erip júrýinsiz úıden tys jerde bolýy» boıynsha 109 fakti tirkeldi. Balalardyń zańdy ókilderi ákimshilik jaýapkershilikke tartyldy. Sondaı-aq, oıyn-saýyq mekemeleriniń ıeleri saǵat 22.00-den keıin ata-analary nemese olardy almastyratyn tulǵalary joq balalardy kirgizgeni úshin jaýapkershilikke tartyldy, — delingen habarlamada.

Esterińizge sala keteıik, Qazaqstan Respýblıkasynyń Ákimshilik quqyq buzýshylyq týraly kodeksiniń 442-babyna sáıkes, saǵat 22.00-den 6.00-ge deıin kámeletke tolmaǵandardyń zańdy ókilderiniń erip júrýinsiz úılerinen tys jerde zańdy ókilderiniń erip júrýinsiz oıyn-saýyq mekemelerinde bolýyna jáne júrýine tyıym salynady.

Reıdtik is-sharalar qoǵamda quqyqtyq sana men mádenıet deńgeıin arttyrý, zańdylyq qaǵıdattaryn damytý jáne kez kelgen quqyq buzýshylyqtarǵa múldem tózbeýshilik maqsatynda júrgiziledi.

Buǵan deıin habarlaǵanymyzdaı, elordada úıge qamalyp qalǵan úsh jasar bala qutqaryldy.