Astanada qalyń qar jaýyp, 2600-den astam kommýnaldyq qyzmetker qar kúreýge shyqty

<p>ASTANA. KAZINFORM - Astanada ekinshi kún qar jaýyp tur. Kommýnaldyq qyzmetter aýa raıynyń qolaısyzdyǵyna qaramastan táýlik boıy kúsheıtilgen rejımde jumys istep jatyr, dep habarlaıdy elorda ákimdiginiń resmı saıty.</p>

20-ynan 21 jeltoqsanǵa qaraǵan túnde kommýnaldyq qyzmetter Astanadan 2357 júk kóligi nemese 30 myń tekshe metr qar shyǵardy. 

Foto: Astana ákimdigi

1 jeltoqsan kúni tańerteń qar kúreý jumystaryna 2600-den astam jol jumysshysy men 1500-den astam arnaıy tehnıka jumyldyryldy.

Qys mezgiliniń basynan beri polıgondarǵa qaladan 99 829 reıspen 1,2 mln tekshe metrden astam qar shyǵaryldy.

Erejege sáıkes, eń aldymen, qalada keptelis bolmas úshin óte qarqyndy qozǵalys ýchaskeleri tazalanady. Sondaı-aq ortasha qarqyndylyǵy bar ýchaskeler-alańdar, vokzal mańy aýmaqtary, trotýarlar, áleýmettik nysandarǵa kirme joldar jáne t. b. oryndar qardan tazartylady.

Ortalyq kóshelerde, jolaýshylar kóligi marshrýttarynda, aıaldamalar men trotýarlarda tazalaý basymdyqqa ıe.

Foto: Astana ákimdigi

Elordada birneshe jabdyqtalǵan qar polıgony jumys isteıdi. Olar samosval tehnıkasynyń nómirlik belgilerin oqý júıesimen jabdyqtalǵan, munda beınebaqylaý kameralary ornatylǵan, jaryqtandyrý qosylǵan.

Elorda turǵyndary men qonaqtarynan joldarda abaı bolýdy, qaýipsizdik erejelerin saqtaýdy, daýyldy eskertý bolǵan jaǵdaıda alys saparlardan bas tartýdy suraıdy.

Tótenshe jaǵdaı týyndaǵan kezde «112» telefonyna habarlasyńyz.

Osyǵan deıin habarlaǵanymyzdaı, elordanyń ortalyq saıabaǵynda shańǵy maýsymynyń ashylýy ótedi.