Astanada qalalyq qyzmetter ortalyǵy ondaǵan kommýnaldyq kásiporyndardy almastyrady

ASTANA. QazAqparat  - Bolashaqta qala turǵyndary túrli anyqtama men qujattardy alý nemese toltyrý úshin memlekettik nemese kommýnaldyq kásiporyndardy aralap júrmeıdi, dep jazady Astana qalasy ákimdiginiń resmı saıty.

Búgingi tańda elordada 17 ákimdik basqarma, tutynýshylarǵa qyzmet kórsetetin 10-nan astam kommýnaldyq kásiporyn bar. Olar qalanyń ár aımaǵynda ornalasqan jáne turǵyndarǵa qolaısyzdyq týdyrýda. Sol sebepti ákimdikte qalalyq qyzmetter ortalyǵy, ondaǵan kommýnaldyq kásiporyndar men memlekettik qurylymdardyń basyn biriktiretin ortaq alań qurýdy oılastyrdy.

Astanada alǵash ret «Astana qalasy ákimdiginiń qalalyq jedel áreket jáne monıtorıng ortalyǵy» (iKomek) bazasynda túrli qyzmetterdiń basyn qospaq. Bul ortalyqta Astana qalasynyń turǵyndary kez kelgen qyzmetti, jergilikti memlekettik organdardyń, ákimdiktiń qurylymdyq bólimsheleriniń, kommýnaldyq qyzmetterdiń jáne damý ınstıtýttarynyń kez kelgen qyzmetin ala alady.

Ortalyq shamamen 17 qalalyq qoǵamdyq jáne kommýnaldyq mekemelerdiń 40-qa tarta qyzmetin biriktiredi. Atap aıtqanda, Qala ortalyǵynda, mynadaı qyzmet túrlerin júzege asyrý josparlanǵan:

- gaz berý tehnıkalyq sharttary; sýmen jabdyqtaý jáne sý burý, jylý jáne elektr jelileri;

- sáýlet jáne jer qatynastary salasynda qyzmet kórsetý jáne konsýltatsııa alýǵa ruqsat qujattaryn, jer ýchaskesiniń nysanaly maqsatyn ózgertý, jer ýchaskesine berilgen memlekettik aktini qaıta rásimdeý,sáýlet-josparlaý tapsyrmasyn alý;

- konsaltıngtik qyzmetter kórsetý, memlekettik baǵdarlamalar boıynsha keńes, qarjy ınstıtýttarynyń qarjylandyrý sharttary, býhgalterııa máseleleri boıynsha;

- «Kóshe saýdasy» baǵdarlamasy boıynsha;

- vızalyq máseleler boıynsha konsýltatsııalar, bıznes jáne ınvestorlyq sanat vızalary, ınvestıtsııalyq kelisimsharttar boıynsha;

- tulǵalardy tirkeý, jumys izdeýshiler, sheteldik jumys kúshine Qazaqstanda bolý merzimin uzartý jáne olardy tartýǵa ruqsat berý, turǵyn úı boıynsha esepke alý jáne kezekke qoıý.

Ortalyq «bir tereze» qaǵıdatymen jumys jasaıdy. Ortalyq birneshe mekenjaıda ornalasatyn bolady. Bul qala turǵyndarynyń yńǵaılyǵy úshin arnaıy mekeme qarastyrylǵan alǵashqy joba. 

Ortalyqtyń ashylýy ákimshilik kedergilerdi tómendetýge, kásipkerlerdi qoldaýdyń tıimdi júıesin damytýǵa, sybaılas jemqorlyq faktilerin boldyrmaý jáne memlekettik organdar qyzmetiniń ashyqtyǵyna ákeledi.