Astanada Jastar Synergy haby qurylady

ASTANA. QazAqparat - Elordadaǵy "Jastar" saraıynda Jastar Synergy haby qurylady. Jastar haby shyǵarmashylyq áleýetti júzege asyrý ortalyǵy bolmaq, dep habarlaıdy Astana ákimdigi.

"Men bizdiń jastarymyzdyń naqty alańy - "Jastar úıi" bolýy tıis dep aıtqan bolatynmyn. Sondyqtan biz dereý "Jastar" saraıyn jóndeý týraly sheshim qabyldadyq. Bul bir ǵımaratta jastarǵa arnalǵan kovorkıng-ortalyq, "Rýhanı jańǵyrý" qalalyq jobalaý keńsesi, Azamattyq bastamalardy qoldaý ortalyǵy sııaqty úsh baǵyt júzege asyrylady. Jaqyn arada biz ony tanystyrýymyz kerek", - dedi Astana ákimi Baqyt Sultanov Jastar isi jónindegi keńestiń otyrysynda.

Osylaısha, jańa ortalyqta elorda jastarynyń shyǵarmashylyq áleýetin iske asyrý úshin barlyq jaǵdaı jasalady.

Munda jastar úshin qazirgi zamanǵy kovorkıng, ashyq kitaphana, "Rýhanı jańǵyrý" qalalyq-jobalyq keńsesi, jastar ÚEU-na arnalǵan azamattyq bastamalar ortalyǵy, "Jas sarbaz" qalalyq balalar-jasóspirimder áskerı-patrıottyq qoǵamdyq birlestigi jáne astanalyq baspasóz ortalyǵy qurylady.