Astanada ınnovatsııalyq emdeý ádisiniń arqasynda 10 naýqas mı qan tamyrlary aýrýynan jazyldy

ASTANA. 31 qazan. QazAqparat - Elordada mı qan tamyrlaryn emdeýdiń ınnovatsııalyq ádisi engizilip, 10 naýqas atalǵan indetinen jazyldy. Bul týraly №1 qalalyq aýrýhananyń baspasóz qyzmetine silteme jasap astana.kz habarlady.

Bul ádis ústimizdegi jyldyń shilde aıynda №1 qalalyq aýrýhananyń ınterventsııalyq rentgenhırýrgııa bólimshesiniń hırýrgtarymen engizilgen. Ol mı qan tamyrlarynyń anevrızmasyn mıkrospıraldermen embolızatsııalaýdy emdeýge kómektesedi. «Anevrızma - zulym aýrý. Onymen ómir boıy súrýge bolady, ne bolmasa júıke kúızelisinen keıin ol jarylyp, mıǵa qan ketýi múmkin. Nátıjesinde, adam kóz jumady nemese múgedek bolyp qalady. Hırýrgııalyq kómek kórsetilmegen jaǵdaıda, aýrý beleń alǵan alǵashqy jyly naýqastardyń 70% qaıtys bolady, tiri qalǵan 25% múgedek bolyp qalady. Qazirgi ýaqytta dúnıe júzinde anevrızmany emdeýdiń eń tıimdi joly - endovaskýlıarlyq (tamyrishilik) em bolyp tabylady», - delingen habarlamada.

Aıta keteıik, №1 qalalyq aýrýhana Qazaqstandaǵy endovaskýlıarlyq emniń ozyq shaǵyn ınvazııalyq ádisterin, sonyń ishinde mı qan tamyrlarynyń anevrızmasyn mıkrospıraldermen embolızatsııalaýdyń ádisterin qoldanady. Eske sala keteıik, búgingi tańda ınnovatsııalyq ádisti engizýdiń jáne №1 qalalyq aýrýhananyń rentgenhırýrgtarynyń joǵary kásipqoılyǵynyń, klınıkanyń qazirgi zamanǵy qondyrǵylarmen jabdyqtalýynyń arqasynda on patsıenttiń mı anevrızmasynyń jarylýyna jáne onyń asqynýyna jol berilgen joq.