Astanada Inklıýzıvti fýtbol lıgasynyń tusaýkeseri ótti
UNI Football League dep atalatyn biregeı jobanyń júzege asýyna «Bolashaq» korporatıvtik qory jáne Qazaqstan fýtbol federatsııasy muryndyq bolǵanyn atap ótken jón. Al «Freedom Shapaǵat» qaıyrymdylyq qory arqyly Freedom Holding Corp demeýshi bolýǵa nıet bildirgen.
UNI Football League – 13-18 jas aralyǵyndaǵy aýtızm jáne Daýn sındromyna shaldyqqandarmen qatar, erekshe qajettilikteri bar balalar men jasóspirimderge arnaıy ázirlengen fýtbol jobasy. Jobanyń maqsaty aıtpasa da túsinikti. Damýynda erekshelikteri bar balalar men jasóspirimderdiń fýtbol arqyly salaýatty ómir saltyn ustanýy, jigerli bolyp qalyptasýy – basty nazarda.
Atalǵan joba byltyr qarashada Astanada «Bolashaq» qorynyń jyl saıynǵy qysqy qaıyrymdylyq balynan túsken qarajat esebinen bastalǵan-dy. Búginde sektsııada 12 bala jattyǵyp júr. Jalpy, jobanyń geografııasy Qazaqstannyń 9 qalasyn (Shymkent, Atyraý, Qaraǵandy, Astana, Kókshetaý, Petropavl, Taraz, Aqtaý jáne Óskemen) qamtıtynyn atap ótken jón. Onda qazirgi ýaqytta mamandandyrylǵan fýtbol sektsııalaryna qabyldaý júrgizilip, komandalar qurylyp jatyr. Jalpy, joba shamamen 160-qa jýyq bala men jasóspirimdi qamtıdy dep kútilip otyr. Al bıyl qyrkúıek aıynda Astana qalasynda respýblıkalyq «UNI Football» chempıonatyn ótkizý josparlanyp otyr. Bul týrnır Qazaqstanda mentaldyq buzylystary bar adamdar arasynda fýtboldy damytý úshin aýqymdy alań qurý jolyndaǵy mańyzdy qadam bolmaq.
«UNI Football League elimizdegi ınklıýzıvti fýtboldy damytýda mańyzdy qadam bolatynyna senimdimiz. Joba erekshe balalarǵa jańa múmkindikter ashady jáne erekshe qajettilikteri bar adamdardy belsendi áleýmettik ómirge qosý arqyly olardyń qoǵamda qabyldanýyna oń áser etedi. Qazaqstan fýtbol federatsııasy men «Freedom» kompanııasyna jobany qoldaǵandary úshin shyn júrekten alǵys aıtamyz. Jalpy, Astana qalasy ákimi janyndaǵy Inklıýzııa jónindegi qoǵamdyq keńestiń jumysy aıasynda biz erekshe balalardyń sport sektsııalaryna qatysyp, joǵary jetistikterge jetýin kóp kóńil bólemiz», - dedi Bolashaq» qorynyń Qamqorshylyq keńesiniń tóraıymy Dınara Gaplan.
Aıta keteıik, QR Ispanııa Koroldiginiń Elshisi Horhe Ýrbıola Lopes de Montenegro ótken jyly qaıyrymdylyq aýktsıonyna ataqty «Real Madrıd» jáne «Barselona» fýtbol klýbtary oıynshylarynyń qoltańbasy qoıylǵan jeıdelerdi, ıspan shabandozy Fernando Alonsonyń qoltańbasy qoıylǵan beısbolkany, burynǵy álemniń birinshi raketkasy Rafael Nadaldiń qoltańbasy bar jeıdeni jáne taǵy basqa 7 baǵaly sporttyq zattardy qoıyp, qaıyrymdylyq sharasyna belsendi atsalysqan. Bul rette, jobanyń júzege asýy atalǵan aýktsıonnan túsken mol qarajatpen baılanysty ekenin atap ótken jón.
Qazaqstan fýtbol federatsııasynyń Prezıdenti Ádilet Barmenqulov óz sózinde federatsııa tarapynan aýtızm jáne Daýn sındromy bar balalarmen jumys isteıtin jattyqtyrýshylarǵa arnalǵan ádistemelik qural ázirlenip jatqanyn atap ótti. Sondaı-aq, QFF «Bolashaq» qorymen birlesip, UNI Football League jattyqtyrýshylary men qyzmet kórsetýshi personaly úshin jyl saıyn mamandandyrylǵan kýrstar ótkizýdi josparlap otyr.
«UNI Football League jobasynyń mán-maǵynasy tereń. Bul bastama balalardyń barlyǵyna teń múmkindik beredi. Biz ár balanyń fýtboldyń bir bóligi bolǵanyn qalaımyz. Sonymen qatar, bul ata-analardy qoldaıtyn mańyzdy jobaǵa aınalyp otyr. Fýtbol mektepteri elimizdiń jeti qalasynda jumysyn bastady. Federatsııanyń basty mindeti – fýtboldyń ár baǵytynda mańyzdy jobalardy daıyndap, olardyń ári qaraı jandanýyna jol ashý, ınvestor tartý. Osy jobaǵa qoldaý kórsetken «Bolashaq» pen «Freedom Shapaǵat» uıymdaryna alǵys aıttamyn», - dedi Ádilet Barmenqulov.
Rına esimdi ata-ana Daýn sındromyna shaldyqqan 15 jastaǵy balasynyń fýtbol sektsııasyna qatysqannan keıin ómirge degen qulshynysy arta túskenin aıtty.
«Balam 15 jasqa kelgenshe sporttyń bar túrine qatysyp úlgerdi. Dese de, fýtbol sektsııasyna qatysqannan beri bul onyń súıikti sporty ekenine kóz jetkizdik. Bastysy, balam tártipti bola bastady. Sektsııany zor yntamen kútip júredi. Mundaǵy jattyqtyrýshylar óte bilikti. Jobany júzege asyrýǵa atsalysqan barlyq azamattarǵa ata-analar atynan sheksiz alǵysymdy bildiremin», - deıdi ol.
Jattyqtyrýshylar demekshi, jobaǵa ınklıýzıvti bilim berý kýrstarynan ótken, múmkindigi shekteýli balalarmen tájirıbesi bar B, C, D UEFA sanatyndaǵy bapkerler tartylǵanyn atap ótken jón.
«UNI Football League jobasy – ınklıýzıvti fýtbol lıgasy ǵana emes, armandardyń, múmkindikterdiń jáne adam múmkindikterine sheksiz senimniń alańy», - dep atap ótti «Freedom Shapaǵat» korporatıvtik qorynyń Prezıdenti Baǵlana Mýsına.