Astanada ımportty yǵystyra alatyn otandyq óndirýshiler tanystyryldy

ASTANA. QazAqparat - Búgin Astanada «Sýbkontrakt bırjasy 2018» ekinshi forýmy óz jumysyn bastap, onda iri alpaýyt kompanııalar otandyq óndirýshilermen ózara kelisimdi bekitip jatyr, dep habarlaıdy QazAqparat.

«Osy tektes bırja ekinshi márte ótkizilip jatyr. Ótken jyly biz ony «EKSPO-2017» halyqaralyq kórmesi alańynda uıymdastyrǵan edik. Bul tetik mashına qurylysy, hımııa, qurylys materıaldary óndirisi men jeńil ónerkásipte ımportty almastyrý máselelerin sheshedi. Eger de 2017 jyldyń qorytyndysy boıynsha jer qoınaýyn paıdalanýshylar, ulttyq jáne júıe quraýshy kompanııalardyń satyp alýlaryna toqtalsaq, jergilikti qamtýdyń úlesi jeńil ónerkásipte 21,3 paıyzdy, mashına qurylysynda - 9 paıyz, hımııada - 27,5 paıyz, sondaı-aq qurylys materıaldary óndirisinde 23,5 paıyzdy qurady. Osy arqyly ishki naryqta otandyq óndirýshiler úshin eleýli áleýet bar ekenin baıqap otyrmyz. Qazaqstan aýmaǵyna basqa elderden keletin jabdyqtardy almastyrýdyń ári óndiris kólemin arttyrýdyń múmkindikteri barshylyq. Osyǵan baılanysty búginde otandyq óndirýshilermen ózara is-qımyl tetikterin ázirleý boıynsha iri júıe quraýshy kásiporyndarmen tıisti jumystar júrgizilip jatyr», - dedi QR IDM Indýstrııalyq damý jáne ónerkásiptik qaýipsizdik komıteti tóraǵasynyń orynbasary Tımýr Nurashev.

T. Nurashev 2017 jyly mınıstrliktiń, Ulttyq kásipkerler palatasy jáne iri júıe quraýshy kásiporyndar arasynda úshjaqty kelisim bekitilgenin eske salyp ótti. Bul kelisimde osy kásiporyndar jyl saıyn turaqty túrde satyp alatyn ónimderdiń tizbesi aıqyndaldy. Osy oraıda úshinshi elderdiń ónimderin almastyrýdyń aýqymdy múmkindigi ashyldy.

«Shyn máninde bul baǵyttaǵy jumystardy durys uıymdastyrsaq, onda otandyq óndirýshilerdiń ónimderine aıtarlyqtaı turaqty suranysty qura alamyz. Bıyl da bul baǵyttaǵy jumystar jalǵasyn tabady», - dedi T. Nurashev.

Aıta keteıik, bırjaǵa «Qazaqmys korporatsııasy» JShS, «Eýrazııalyq top» JShS, «Qaztsınk» JShS, «ArselorMıttal Temirtaý» AQ,  «Teńizshevroıl» JShS, «Qarashyǵanaq  Petroleým  Opereıtıng B.V.» AQ, «SNPS - Aqtóbemunaıgaz» AQ, «Samuryq-Qazyna Kontrakt» JShS sııaqty iri tapsyrys berýshi  kompanııalardyń ókilderi, júıe qurýshy kásiporyndar, ulttyq kompanııalar jáne otandyq taýar óndirýshiler qatysty.