Astanada II dúnıejúzilik soǵys qurbandaryn eske alýǵa arnalǵan sherý ótti
Myńdaǵan astanalyqtar merekege atalarynyń sýretterin ustap shyqty. Merekelik sherý «Qazaq eli» monýmentinen bastaldy. Basqa adamdar kolonnaǵa jol-jónekeı qosylyp otyrdy. Sóıtip, Otan qorǵaýshylar memorıalyna jetkenshe «Jaýjúrek polktiń» uzyndyǵy bir shaqyrymnan asyp ketti.
Sherýge Ulttyq ǵylymı medıtsınalyq ortalyqtyń basshysy Abaı Baıgenjın de qatysty. Onyń ákesi - Qabataı Baıgenjın Aqmola oblysynda jasaqtaǵan 29-shy atqyshtar dıvızııasynyń quramynda soǵysqa attanǵan.
«Olardy birden Stalınıngradqa jiberdi. Sol jerde 1942 jyly ákemniń ókpesine oq tıgen. Jaraqaty uzaq ýaqyt jazylmady. Ony jarty jyldan keıin keri qaıtardy. Degenmen, 1943 jyly ol taǵy soǵysqa surandy. Sodan ony Vladıvostok jaqtaǵy rezervke jiberdi. Olar Japonııa jaqtan keletin qaýip-qaterdi baqylap otyrdy. Ákem áskerı qyzmetin batalonnyń kishi saıası jetekshisinen bastady. Soǵys aıaqtalǵanda kapıtan boldy. Polktiń bas saıası jetekshisi qyzmetine deıin jetti», - dedi A.Baıgenjın QazAqparat tilshisine bergen suxbatynda.
Onyń aıtýynsha, Qabataı Baıgenjın soǵystan keıin balalar úıin, odan keıin mektepti basqardy. Zeınetke shyqty. Biraq uzaq jasaı almady. Soǵys kezinde alǵan jaraqaty syr berdi.
Aıta keteıik, búgin Uly Jeńis kúnine oraı Úkimet pen Parlament basshylary Otan qorǵaýshylar monýmentine gúl shoqtaryn qoıyp, saltanatty sharaǵa jınalǵan ardagerlermen suhbattasty.
Al «Nur Otan» partııasy tóraǵasynyń birinshi orynbasary Máýlen Áshimbaev «Umytylǵan batyrlar» atty respýblıkalyq aktsııanyń bastalǵanyn jarııalady.