Astanada IFC qoldaýymen memlekettik-jekeshelik áriptestik jobalaryn damytý máselesi talqylandy

<p>ASTANA. KAZINFORM - Premer-Mınıstrdiń orynbasary &ndash; ulttyq ekonomıka mınıstri Nurlan Baıbazarov Astanada Halyqaralyq qarjy korporatsııasynyń (IFC-Dúnıejúzilik bank tobyna kiredi) sektoraralyq sheshimder jónindegi vıtse-prezıdenti Emmanýel Nıdjırınkındrımen kezdesý ótkizdi.</p>

Kezdesýge Taıaý Shyǵys, Ortalyq Azııa, Túrkııa, Aýǵanstan jáne Pákistan elderindegi memlekettik-jekeshelik áriptestik mámileleri boıynsha IFC konsýltatıvtik tobynyń óńirlik menedjeri Maıkl Opagı, Qazaqstan, Qyrǵyzstan jáne Tájikstan boıynsha IFC óńirlik menedjeri Zafar Hashımov jáne Dúnıejúzilik Banktiń Qazaqstan men Túrikmenstandaǵy turaqty ókili Andreı Mıhnev qatysty.

Taraptar tikeleı sheteldik ınvestıtsııa tartý jáne iri ınfraqurylymdyq jobalardy memlekettik-jekeshelik áriptestik tetigi arqyly iske asyrý máselelerin talqylady.

Nurlan Baıbazarov IFC-men yntymaqtastyqta iske asyrylatyn jobalar eldiń turaqty damýy men ekonomıkalyq ósýin qoldaýda sheshýshi ról atqaratynyn atap ótti. Osyndaı jobalardyń biri Úlken Almaty aınalma avtojoly (ÚAAAJ) jáne Almaty qalasy halyqaralyq áýejaıynyń jańa termınalyn jańǵyrtý.

Vıtse-premerdiń aıtýynsha, Qazaqstan energetıka, kólik, TKSh salasyndaǵy MJÁ jobalaryn qurylymdaýǵa, sondaı-aq gaz jylý elektr stantsııalaryn, jel parkterin, tazartý qurylystaryn salýǵa kómek kórsetý jónindegi IFC bastamasyn quptaıdy.

«Áriptestik jyldarynda biz ekonomıkalyq máselelerdiń keń spektrin qozǵaıtyn ózara tıimdi yntymaqtastyqty qura aldyq, ony odan ári damytýǵa nıettimiz. Atap aıtqanda, biz óz mamandarymyzdy ınfraqurylymdyq jobalar men arnaıy qorlar qurý salasyndaǵy halyqaralyq IFC sertıfıkattarymen oqytýǵa jáne sertıfıkattaýǵa múddelimiz», — dedi N. Baıbazarov.

Óz kezeginde Emmanýel Nıdjırınkındrı IFC Qazaqstannyń uzaq merzimdi áleýetin atap ótip, onyń basym damý baǵyttaryn qoldaýdy jalǵastyratynyn aıtty.

Sondaı-aq IFC ókilderi eldiń turaqty jáne ınklıýzıvti ósýi maqsatynda memlekettik-jekeshelik áriptestiktiń órshil jobalaryn tabysty iske asyrýǵa járdemdesý úshin halyqaralyq tájirıbe men resýrstar usynýǵa daıyn ekendikterin bildirdi.