Astanada halyqtar birligin nyǵaıtýǵa úles qosqan jýrnalıster marapattaldy

ASTANA. QazAqparat  - Qazaqstan halqy Assambleıasy baılanys jáne aqparat qyzmetkerleriniń kásibı merekesi qarsańynda rýhanı birlikti, dostyq pen etnosaralyq yntymaqtastyqty nyǵaıtýǵa belsendi úles qosyp júrgen BAQ ókilderin marapattady, dep habarlaıdy «QazAqparat» HAA tilshisi.  

Astanada Qazaqstan halqy Assambleıasynyń jýrnalıster klýbynyń «Rýhanı jańǵyrý: sananyń jańǵyrýy» atty keńeıtilgen otyrysy ótip jatyr. Onda rýhanı jańǵyrý, qoǵamdyq kelisim men jalpyulttyq birlikti nyǵaıtýdy aqparattyq qoldaý konteksindegi jýrnalıster qaýymy aldynda turǵan mindetter talqylanýda.

Otyrys barysynda Qazaqstan halqy Assembleıasy Tóraǵasynyń orynbasary Darhan Myńbaı qaıyrymdylyqty, rýhanı birlikti, dostyq pen etnosaralyq yntymaqtastyqty nyǵaıtýǵa belsendi úles qosyp júrgen Erlan Atambaev, Tileýqabyl Myńjasar, Erjan Ýaıys, Danara Jumanova, Marjan Kármenova, Erlan Igisinov, Órken Kenjebek syndy respýblıkalyq jáne óńirlik BAQ jýrnalısterin alǵys hattarymen jáne baǵaly syılyqtarmen marapattady. 

Aıta keteıik, shara sońynda telejúrgizýshi Erlan Igisinov, bloger Órken Kenjebek, telejúrgizýshi Alevtına Madııarova, «ystyq» núktelerden habar taratqan korrespondent Rýslan Ydyrysov jáne «Birlik» radıobaǵdarlamasynyń júrgizýshileri Janbolat Shákim men Olga Oparına jýrnalısterge TEDx konferentsııasy formatynda sheberlik sabaqtaryn ótkizedi.