Astanada Halyqaralyq jasyl tehnologııalar jáne ınvestıtsııalyq jobalar ortalyǵy tanystyryldy
«Kúrdeli syn-tegeýirinderdiń biri ekonomıkalyq ósimdi, áleýmettik turaqtylyqty jáne uzaqmerzimdi keleshekte ekologııalyq teńgerimdilikti qamtamasyz etý sanalatyndyǵy sózsiz. Bul jahandyq qaýipsizdiktiń eń ózekti máseleleriniń biri jáne Qazaqstan mol tabıǵı resýrstarǵa ıe el retinde álemdik energetıkalyq qaýipsizdiktiń turaqty damýyn qamtamasyz etýdegi óz jaýapkershiligin túsinedi. 2030 jylǵa deıingi kún tártibi men Parıj kelisimi álemdik qoǵamdastyq tolyqtaı alǵanda klımattyq ózgeristerdi ustap turý úshin kúsh-jiger biriktirýge daıyn ekendigin pash etip otyr. Búginde biz úshin atalǵan protsestegi óz úlesimizdi, álemdik qoǵamdastyqtyń qoldaýymen, Prezıdentimiz Nursultan Nazarbaevtyń bastamasymen qurylǵan Halyqaralyq jasyl tehnologııalar jáne ınvestıtsııalyq jobalar ortalyǵyn Sizderge tanystyrý zor qurmet dep sanaımyz», - dedi shara barysynda QR Premer-Mınıstri Baqytjan Saǵyntaev.
Osy rette Premer-Mınıstr BUU, EYDU, EQYU, Jańaratyn energııa kózderi jónindegi halyqaralyq agenttik, Dúnıejúzilik bank, EQBU, Azııa banki jáne Eýropalyq komıssııaǵa qoldaý kórsetkenderi úshin rızashylyq bildirdi.
«Halyqaralyq ortalyq ótken jyly Astanada ótken «EKSPO-2017» halyqaralyq kórmesiniń murasy bazasynda qurylǵan jáne óńirdegi jasyl ekonomıkalyq ósimdi kúsheıtýge baǵyttalǵan «Jasyl kópir» seriktestik baǵdarlamasynyń jalǵasy sanalady. Biz ol Ortalyq Azııadaǵy birinshi tehnologııalyq ortalyq retinde ınvestıtsııa úshin turaqty ınstıtýttyq negizge aınalady dep senemiz», - dedi ol.
Ol Qazaqstan Úkimeti jańaratyn energııa kózderin damytý strategııasyn, óńirlik deńgeıde qorshaǵan ortaǵa keri áserlerdi tómendetýdi ustanatyndyǵyn basa aıtty.