Astanada halyqaralyq STEAM olımpıadasy ótedi

ASTANA. QazAqparat – Elordada qalalyq jáne halyqaralyq eki STEAM olımpıadasy ótedi. Bul týraly «Astana Innovations» AQ basqarma tóraǵasynyń orynbasary Danıal Aıtkenov aıtyp berdi, dep habarlaıdy QazAqparat.

«STEAM olımpıadasy – tehnıkalyq bilim berýdegi barlyq sońǵy jetistikterdi qamtıtyn ınnovatsııalyq bilim berý olımpıadasy. Olımpıada baǵdarlamalaý, ınjenerlik robototehnıka jáne 3D modeldeý sııaqty tehnıkalyq salalarda bilim berýdi qamtıdy. STEAM bilim berýdi nasıhattaý naqty ómirde ǵylymı-tehnıkalyq bilimdi qoldanýdy jáne balalardaǵy tehnıkalyq pánderge qyzyǵýshylyqty damytýdy bildiredi. 2017 jyldan bastap 5 olımpıada ótkizildi. Bıyl qalalyq jáne halyqaralyq 2 STEAM olımpıadasyn ótkizý josparlanǵan», - dedi D. Aıtkenov Astana kommýnıkatsııalar qyzmetinde ótken brıfıngte.

Olımpıadany Astana qalasynyń ákimdigi tsıfrlandyrý jáne memlekettik qyzmet basqarmasy, «Astana Innovations» AQ, STEAM Akademııasy jáne Astana IT University qoldaýymen ótkizedi.

«Sharaǵa elordalyq bilim berý mekemeleriniń oqýshylary, barlyq oblystar men qalalardyń mektep oqýshylary jáne shet elderden kelgen oqýshylar da qatysady. Aıta ketý kerek, mundaı olımpıadalar elordalyq oqýshylardyń tsıfrlyq saýattylyǵyn arttyratyny sózsiz. Qalalyq STEAM olımpıadasyna 200 oqýshy jáne halyqaralyq STEAM olımpıadasyna taǵy 200 oqýshy qatysady dep josparlanyp otyr», - dedi D. Aıtkenov.