Astanada Halyqaralyq shahmat federatsııasynyń áıelder týrnıri bastaldy

ASTANA. QazAqparat – Elordada FIDE áıelder arasyndaǵy gran-prı jarysynyń birinshi kezeńi ashyldy, dep habarlaıdy QazAqparat tilshisi.

Týrnırge álemniń eń úzdik 12 shahmatshysy qatysady. Elimiz namysyn Bıbisara Asaýbaeva men Jansaıa Ábdimálik qorǵaıdy.

Jarystyń ashylý saltanatynda QR Mádenıet jáne sport mınıstri Dáýren Abaev oıynshylarǵa sáttilik tiledi.

«Sizderdi elordamyzda uıymdastyrylyp otyrǵan shahmattan FIDE Gran-prı áıelder serııasy birinshi kezeńiniń saltanatty ashylýymen shyn júrekten quttyqtaımyn. Bundaı joǵary deńgeıdegi halyqaralyq týrnırdiń elimizde ótýin erekshe oqıǵa deýge bolady. Sondaı-aq bul jarys shahmat sportyn respýblıkamyzda jáne halyqaralyq arenada damytýǵa, keńinen tanytýǵa jol ashady. Shahmatshylardyń kásibı sheberligi shyńdalatyn, salaýatty ómir saltyn nasıhattaıtyn búgingi týrnırde shyn myqtylardyń jeńis tuǵyrynan kórinýine tilektespin», - dedi D. Abaev.

Mınıstrdiń aıtýynsha, Halyqaralyq shahmat federatsııasy (FIDE) 2022 jyldy «Shahmattaǵy áıelder jyly» dep jarııalady.

«Bul áıelderdiń shahmat ómiriniń barlyq salalaryna kóbirek qatysýy úshin aıtarlyqtaı qoldaý kórsetetinine senimdimin», - dedi Mádenıet jáne sport mınıstri.

Matchtar kún saıyn elorda ýaqytymen 15:00-de bastalady. Týrnır 30 qyrkúıekke deıin jalǵasady. Júlde qory 80 000 eýrony quraıdy. Birinshi oryn alǵan shahmatshy 15 myń eýro alady.

Týrnır qorytyndysy boıynsha WGP serııasynda eń kóp upaı jınaǵandar FIDE úmitkerleriniń áıelder týrnırine qatysý quqyǵyna ıe bolady. Osylaısha týrnırge 10 oıynshy iriktelgen:

Aleksandra Gorıachkına FID - (FIDE)

Ekaterına Lagno - FID(FIDE)

Alına Kashlınskaıa - POL(Polsha)

Bıbisara Asaýbaeva - KAZ(Qazaqstan)

Tan Chjýnı - CHN(Kıtaı)

Dınara Vagner - GER(Germanııa)

Elızabet Petts - GER(Germanııa)

Chjý Tszıner - CHN(Kıtaı)

Jansaıa Ábdimálik - KAZ(Qazaqstan)

Aleksandra Kostenıýk - FID(FIDE)

Rameshbabý Vaıshalı - IND(Úndistan)

Polına Shývalova - FID(FIDE).