Astanada Halyqaralyq balet festıvaliniń shymyldyǵy ashyldy

  ASTANA. QazAqparat - «Astana Balet» teatrynyń sahnasynda «Astana bı yrǵaǵynda» («Temps Lie») Halyqaralyq balet festıvaliniń shymyldyǵy ashyldy, dep habarlaıdy QazAqparat tilshisi.

Bıyl Astananyń 20 jyldyq mereıtoıyn merekeleý aıasynda QR Mádenıet jáne sport mınıstrliginiń qoldaýymen Qazaq ulttyq horeografııa akademııasy atalǵan festıvaldi 3-5 mamyr aralyǵynda ótkizgeli otyr. Búgingi shara Qazaq ulttyq horeografııa akademııasy oqýshylarynyń kontsertimen ashyldy. Uıymdastyrýshylardyń aıtýynsha, úsh kúndik kontserttik baǵdarlamaǵa klassıkalyq balet murasynyń, zamanaýı jáne qazaq horeografııasynyń otandyq jáne sheteldik baletmeısterleriniń qoıylymyndaǵy eń úzdik nómirleri enedi.

«Elbasy Nursultan Nazarbaevtyń tikeleı qoldaýymen ashylǵan Qazaq ulttyq horeografııa akademııasy az ǵana ýaqyttyń ishinde Astananyń mádenı-rýhanı tórinde óziniń laıyqty ornyn aldy. Sharanyń basty maqsaty - bizdiń eldegi horegrafııa ónerin órkendetý. Halyqaralyq balet festıvaline shyǵarmashylyq sıpat alyp kelgen bizdiń akademııanyń rektory Altynaı Asylmuratovaǵa, akademııanyń kórkemdik jetekshisi Ásel Qurmanbaevaǵa alǵys aıtýǵa ruqsat etińizder. Astananyń 20 jyldyǵy aıasynda ótkizilip otyrǵan festıvalǵa 11 elden, atap aıtqanda, Reseı, AQSh, Japonııa, Ulybrıtanııa jáne taǵy basqa elderdiń ónerpazdary kelip otyr. Halyqaralyq balet festıvaline arnaıy kelgen álemdik balet juldyzdaryna da alǵysymyz sheksiz», - dedi Mádenıet jáne sport mınıstri Arystanbek Muhamedıuly sharanyń ashylý saltanatynda.

Astanadaǵy halyqaralyq sharaǵa álemdik balet juldyzdarynan Máskeýdegi Úlken teatrdyń jáne Londondaǵy Koroldik balettiń jetekshi bıshisi Irek Mýhamedov, Reseıdiń Halyq ártisi Ýlıana Lopatkına, Reseıdiń Eńbek sińirgen ártisi, «Zolotoı sofıt» syılyǵynyń laýreaty Elena Kýzmına, Qytaı ulttyq bı qaýymdastyǵy Balet komıtetiniń vıtse-prezıdenti Sıao Sýhýa, «Sofııa Balet akademııasy» balet mektebiniń dırektory Keısýke Kosaka kelip otyr.

Festıvaldiń ekinshi keshinde, ıaǵnı 4 mamyrda kórermenderdiń nazaryna úsh nomınatsııadaǵy nómirler usynylady. Atap aıqanda, baletsúıer kórermenderge klassıkalyq bı, halyq-sahnalyq (folklor, stıldik halyqtyq) bı, sonymen birge zamanaýı bı kórsetilmek. Qatysýshylar Ts.Pýnınniń mýzykasyna «Esmeralda», L.Delıbtiń mýzykasyna «Koppelııa» baletterinen áıgili varrıatsııalardy, «Spıaşaıa krasavıtsa» baletinen adajıo, V.Vaınonenniń horegorafııasyndaǵy B.Asafevtiń «Plamıa Parıja» baletinen pa-de-de, ázerbaıjan jáne grýzın ulttyq bılerin oryndaıdy.

Festıvalge qatysýshylar balet ónerindegi óz kúshterin synap qana qoımaı, sharaǵa shaqyrylǵan balet óneri sheberleriniń sheberlik synyptarynan tájirıe alý múmkindigine ıe bolmaq. Festıvaldiń qorytyndy kúninde, ıaǵnı 5 mamyrda gala-kontsert ótedi. Ol kúni mártebeli meımandardyń pikiri boıynsha iriktelgen úzdik nómirler kórsetiledi.