Astanada H Azııa neırohırýrgtarynyń kongresi óz jumysyn bastady

ASTANA. QazAqparat - Astanadaǵy «Ulttyq neırohırýrgııa ortalyǵynda» Japonııa, AQSh,Túrkııa, Germanııa, Reseı, Izraıl jáne Qazaqstannyń úzdik neırohırýrgteri sheberlik sabaǵy retinde 7 otanyń úlgisin kórsetti. Bul týraly búgin «Astana Opera» memlekettik opera jáne balet teatrynda bastalǵan H Azııa neırohırýrgtar kongresinde «Ulttyq neırohırýrgııa ortalyǵy» AQ basqarma tóraǵasy Serik Aqsholaqov aıtty.

«Búgin Kongrestiń ashylý saltanaty barysynda Astanadaǵy «Ulttyq neırohırýrgııa ortalyǵynda» Japonııa, AQSh, Túrkııa, Germanııa, Reseı, Izraıl jáne Qazaqstannyń úzdik neırohırýrgteri sheberlik sabaǵy retinde 7 otanyń úlgisin kórsetti. Kongress barysynda biz neırohırýrgııa men nevrologııa salasyndaǵy zamanaýı tehnologııalar men tájirıbe almasý jaıyn talqylaıtyn bolamyz», - dedi ol.

Aıta keteıik, Ortalyq Azııa men TMD keńistiginde tuńǵysh ret ótip otyrǵan aýqymdy shara 13 qyrkúıekke deıin sozylady. Kongress «Biregeı ǵylym - biregeı qala. Eýrazııanyń kindik ortasynda kezdeseıik!» degen uran boıynsha ótýde. Oǵan 50 shaqty eldiń 600-den astam delegaty qatysýda.

S. Aqsholaqovtyń aıtýynsha, kongress jumysy barysynda 240 baıandama tyńdalady. Shara aıasynda ІІІ Azııalyq neırohırýrgııalyq medbıkeler kongresi, sondaı-aq Azııanyń áıel neırohırýrgteri qaýymdastyǵynyń kezdesýi ótedi.

Aıta keteıik, Azııa neırohırýrgteriniń kongresi 1993 jyly alǵash ret Japonııada ótkizilgen bolatyn. Osydan keıin eki jyl saıyn álemniń iri qalalary men el astanalarynda turaqty túrde ótip keledi. Al 2008 jyly Kýala-Lýmpýr qalasynda ótken kezekti jıynda Qazaqstan mereıtoılyq kongrestiń ótkiziletin orny bolyp tańdalǵan bolatyn.