Astanada «Ǵaryshtaný» ortalyǵy ashyldy

ASTANA. QazAqparat - Astanadaǵy №83 mektep-gımnazııasynda  saltanatty túrde «Ǵaryshtaný» ǵylymı-damytý ortalyǵy ashyldy, dep habarlaıdy «QazAqparat» HAA tilshisi.

Jańa ortalyqtyń lentasyn kesý  qurmetine Qazǵarysh ókilderi ıe boldy. «Respýblıkalyq ǵaryshtyq baılanys ortalyǵy» AQ vıtse-prezıdenti  Baýyrjan Qudabaev balalardy  KazSat-2 negizinde qurastyrylǵan ǵaryshtyq apparattyń modelimen tanystyrdy.

Mektep dırektory Sáýle Temenovanyń aıtýynsha, ortalyqtyń maqsaty balalardy ǵarysh álemimen jáne ǵaryshtyq tehnologııalarmen tanystyrý.

Oqýshylar qonaqtardy mekteppen tanystyryp, kitaphanany kórsetti. Qazǵarysh mamandary Qazaqstan ǵaryshkerleri týraly anyqtamalyq kitapty syıǵa tartty.