Astanada ǵarysh apparattaryn qurastyrý-synaý zaýyty salynady
Bul týraly búgin Májiliste Qazaqstanda ǵarysh salasyn qalyptastyrý taqyrybyndaǵy Úkimet saǵatynda QR Ulttyq ǵarysh agenttiginiń tóraǵasy Talǵat Musabaev málimdedi. Agenttik basshysynyń aıtýyna qaraǵanda, «Astana - jańa qala» arnaıy ekonomıkalyq aımaǵynda salynatyn zaýyt Qazaqstandaǵy iri ǵaryshtyq ınfraqurylymdyq nysanyna aınalady.
«Qarapaıym tilmen aıtsaq, bul úlken zamanaýı zaýytta túrli baǵyttaǵy spýtnıkterdi jobalaý, qurastyrý jáne synaý qalyptasady. Ol keshenge arnaıy konstrýktorlyq-tehnologııalyq bıýro da enedi. Qurylys 2015 jyly aıaqtalyp, iske qosylady», - dedi T. Musabaev. Onyń sózine qaraǵanda, mundaı strategııalyq nysannyń bolýy elimizdiń ǵarysh salasy qyzmetine úlken serpin beredi. «Qazaqstannyń ǵarysh apparattaryn jobalaý men qurastyrýdyń naryǵyna shyǵýyn da qamtamasyz etedi», - dedi ol.