Astanada Eýrazııanyń musylman ǵalymdary bas qosady

ASTANA. QazAqparat - 2 naýryz kúni Astanada Qazaqstan musylmandary dinı basqarmasynyń jetekshiligimen Eýrazııa musylman ǵalymdarynyń forýmy ótedi. Mundaı sheshim QMDB Ǵulamalar keńesiniń kezekti otyrysynda qabyldandy, dep habarlaıdy QazAqparat QMDB baspasóz qyzmetine silteme jasap.

Bas múftı Serikbaı qajy Oraz qyzmetkerlerge sharany joǵary deńgeıde ótkizýdi tapsyrdy. Qazirgi ýaqytta arnaıy jumys toby qurylyp, uıymdastyrý sharalary júrip jatyr.

«Mundaı aýqymdy shara Qazaqstanda alǵash ret ótkeli otyr jáne tarıhı oqıǵa bolyp qalmaq. Eýropa men Ortalyq Azııanyń 22 elinen otyzdan astam delegat, atap aıtqanda, bas múftıler, dinı qaıratkerler jáne ıslam uıymdary men odaqtarynyń jetekshileri keledi dep kútilýde», - delingen habarlamada.
 

Ázirge Túrkııa, Reseı, Ózbekstan, Tájikstan, Qyrǵyzstan, Tatarstan, Ázerbaıjan, Rýmynııa, Ýkraına, Latvııa, Lıtva, Estonııa, Polsha, Majarstan, Horvatııa, Mońǵolııa jáne taǵy 18 eldiń bas múftıleri halyqaralyq forýmǵa qatysatyndaryn rastady.

Forýmda Eýrazııa elderi pátýalarynyń ortaq bazasyn qurý máselesi talqylanady jáne «Musylman úmbetiniń tulǵalyq kelbeti» qujaty qabyldanady.