Astanada etnomádenı birlestikterdiń kúnderi aıaqtaldy

ASTANA. QazAqparat - Astanada bilim mekemelerinde ótken etnomádenı birlestikterdiń kúnderi aıaqtaldy. Osy ýaqyt aralyǵynda kórermender etnomádenı birlestikter men Qazaqstan halqy Assambleıasy qyzmeti týraly bilip qoımaı, Qazaqstan aýmaǵynda turatyn etnostardyń baı mádenı muralarymen, ónerlerimen, salt-dástúrlerimen keńirek tanysty.

Etnomádenı birlestikterdiń kúnderi aıasynda «Polıakı» qoǵamdyq birlestigi kontsert qoıyp, óz birlestikteri týraly maǵlumattar berdi. Al «Alef» evreı etnomádenı birlestiginiń qoldanbaly óner kórmesi kópshiliktiń qyzyǵýshylyǵyn týǵyzdy.

Sonymen qatar, №31 mektep-gımnazııasynda «Parvız» tájik mádenı ortalyǵy men «Lad» respýblıkalyq slavıandar qozǵalysynyń fılıaly jasóspirimderge arnalǵan kontsert qoıdy. Shara barysynda tájik mádenı ortalyǵynyń ónerpazy Mıgýnova Nazıranyń fleıta aspabynda oryndaǵan mýzykalyq shyǵarmasy jınalǵandardyń kóńilinen shyqty.

Munymen qosa, ózbek, kúrd, jáne belorýss etnomádenı birlestikteri «Lıngva» Shet tilder kolledjinde óz ulttarynyń ánderi men bılerin kópshilikke usyndy.

Etnomádenı birlestikterdiń kúnderin Qazaq gýmanıtarlyq zań ýnıversıtetiniń kórermender zalynda ótken úlken kontsertpen aıaqtaldy. Onda bolashaq zańgerlerge «Vaınah» sheshen-ıngýsh, «Van» armıan jáne káristerdiń etnomádenı birlestikteri óz ónerlerin tartý etti.

Eske salaıyq, etnomádenı birlestikter kúnderiniń saltanatty ashylýy 17 qazanda elordalyq kólik jáne kommýnıkatsııalar kolledjinde ótti. Onda óz ónerlerin alǵashqy bolyp «Vozrojdenıe» nemister qoǵamy, «Qyrǵystan-Astana» qoǵamdyq birlestigi, sondaı-aq «Tań» tatar-bashqurt mádenı ortalyǵy kórsetken bolatyn, dep jazady astana.gov.kz.