Astanada estrada juldyzdary men múgedektigi bar ártister kontsert qoıdy
«Biz birgemiz Fest» is-sharasynda elimizdiń barlyq óńirlerinen kelgen daryndy balalar men múmkindigi shekteýli jastar bas qosty. Kontsert Balalar jyly aıasynda uıymdastyryldy jáne erekshe qajettilikteri bar balalardy qoldaýǵa arnalǵan.
Іs-sharaǵa Parlament Senatynyń Tóraǵasy Máýlen Áshimbaev qatysty. Ol óz sózinde balalardyń ál-aýqaty, olardyń ıntellektýaldyq, shyǵarmashylyq jáne rýhanı damýy ultymyz úshin mańyzdy basymdyqtar ekenin aıtty.
«Qazirgi tańda elimizde memlekettiń áleýmettik saıasatynyń basymdyqtary týraly túsinik ózgerip jatyr. Ádiletti Qazaqstan degenimiz - eń aldymen, ınklıýzıvti Qazaqstan. Biz kómekke muqtaj ár azamat, ár bala memlekettiń qamqorlyǵyn sezinýge tıis qoǵam quryp jatyrmyz. Memleket basshysy Qasym-Jomart Kemeluly Toqaev osyndaı mindet júktep otyr. Sondyqtan memleket erekshe qajettiligi bar adamdardy qoldap, kedergisiz orta jáne ınklıýzıvti qoǵam qalyptastyrý úshin tıisti jumysty jalǵastyra beredi», – dedi Máýlen Áshimbaev.
Sonymen qatar Senat Tóraǵasy Memleket basshysynyń tapsyrmasy boıynsha elimizde halyqtyń áleýmettik osal toptaryn qoldaý úshin barlyq shara qabyldanatynyn atap ótti. Múgedektigi bar adamdarǵa kómek kórsetýge, daryndy jastar men balalardy qoldaýǵa, bilim berý jáne densaýlyq saqtaý júıelerin nyǵaıtýǵa baǵyttalǵan zańdar qabyldanady.
Palata Spıkeri festıvaldi uıymdastyrýshylar men oǵan qatysýshylarǵa alǵys aıtyp, barsha óner ıesine shyǵarmashylyq jolda jańa jeńisterge jetýge tilektestigin bildirdi.
«Belgili otandyq ónerpazdarmen bir sahnada óner kórsetý erekshe ári jas talant ıelerin yntalandyra túsetini anyq. Ánshilerge shyǵarmashylyq tabys tileımin. Búgingi kontsertten jınalǵan qarajat múgedektigi bar balalarǵa arnalǵan ońaltý ortalyǵyna jabdyq satyp alýǵa jumsalady. Munyń bári óner kez kelgen kedergi men taptaýryndardy buzyp, ıgi ister jolynda barlyǵyn biriktire túsetinin kórsetedi», – dedi Máýlen Áshimbaev.
Festıval aıasynda Kenjebek Nurdoldaı, SENSITIVE bı toby, Altynshash Muqataeva syndy erekshe qajettiligi bar mýzykanttar men bıshiler óner kórsetti. Sondaı-aq áıgili ánshi Dımash Qudaıbergen, estrada juldyzdary: Tamara Asar, Nazıma, «Bastaý» toby, Aidyn jáne taǵy basqalary óz ónerlerin kórermenderdiń nazaryna usyndy.
Sharany Biz Birgemiz Qazaqstan qoǵamdyq qory jáne Astana qalasynyń ákimdigi uıymdastyrdy.
Foto: senate.parlam.kz