Astanada esirtki jarnamalaıtyn 500-ge jýyq graffıtıdiń kózi joıyldy
Uıymdastyrýshylardyń aıtýynsha, is-sharanyń negizgi maqsaty – esirtki qylmysynyń aldyn alý, sondaı-aq tyıym salynǵan zattarǵa táýeldi elorda turǵyndarynyń sanyn azaıtý.
«Elordada esirtki zattarynyń taralý faktileriniń aldyn alý boıynsha aýqymdy profılaktıkalyq jumys júrgizilýde. Basty baǵyttardyń biri – telegram-arnalar nemese saıt siltemeleri kórsetilgen qoǵamdyq oryndardaǵy esirtki graffıtılerin boıaý. Búginde eriktilermen birlesip, olardy boıaý jumysy júrgizilip jatyr», – deıdi Saryarqa aýdany ákimdiginiń qyzmetkeri Damır Hısmatýllın.
Aktsııany memlekettik organdar, jastar uıymdary, mádenıet qaıratkerleri men sportshylar, eriktiler, úkimettik emes uıymdardyń ókilderi jáne basqalar qoldady.
«Búgin biz esirtki zattarynyń taralýyna qarsy kúreske baǵyttalǵan «Nashaqorlyqqa jol joq» uranymen aýqymdy aktsııa ótkizip jatyrmyz. Osy jyldyń basynan bastap Saryarqa aýdanynyń QP qyzmetkerleri esirtki jarnamalaıtyn 500-ge jýyq graffıtıdi boıady. Esterińizge sala keteıik, esirtki graffıtıin salý qylmys bolyp sanalady. Graffıtı-jazýlar jazǵany jáne ınternette esirtki satý týraly málimetterdi taratqany úshin qylmystyń aýyrlyǵyna baılanysty úsh jyldan alty jylǵa deıingi merzimge bas bostandyǵynan aıyra otyryp, QR QK 299-1-baby boıynsha jaza qarastyrylǵan. Bul qylmystyń kýágerleri «102» nómiri boıynsha habarlaý kerek», – dedi Astana qalasy polıtsııa departamenti Saryarqa aýdany polıtsııa basqarmasy bastyǵynyń orynbasary polıtsııa podpolkovnıgi Berik Ýaqbaev.
Profılaktıkalyq is-shara barysynda aýdandyq polıtsııanyń ýchaskelik ınspektorlary ýchaskelerdi aralap, esirtki jarnamasy bar graffıtıdi anyqtady.
Polıtsııa men elorda ákimdigi azamattardy qoǵamdyq tártipti saqtaýǵa jáne qala múlkine uqypty qaraýǵa shaqyrady. Kez kelgen quqyqbuzýshylyq anyqtalady jáne jaýapkershilikke ákep soǵady.