Astanada esirtki qylmysynyń digital-kartasy iske qosyldy

<p>ASTANA. KAZINFORM &ndash; Elordada esirtkini taratý, satý, satyp alý jáne ony jasyryn jarnamalaýdy joıýmen aınalysatyn arnaıy saıt iske qosyldy. Oǵan nashaqorlyqqa qatysty kez kelgen aqparatty jiberip, habarlaýǵa bolady.</p>

«Bizdiń qor Nazarbaev zııatkerlik mektebi oqýshylarynyń jobasyn qoldap, kómektestik. Digital-kartada elimiz boıynsha nashaqorlyqqa qarsy aqparattar bar. Kez kelgen adam esirtkini taratý, jarnamalaý týraly aqparatty kórse, esbol.kz saıtyna kirip nemese Telegram bot arqyly bizge jibere alady. Óz kezegimizde bizge túsken aqparatty quqyq qorǵaý organdary ókilderimen birge anyqtaımyz. Bul jerde esirtkini satýshylar, taratýshylar nemese jarnama jasaýshylar ǵana emes, ony satyp alýshylar da anyqtalady. Sondaı-aq, qazir esirtkini QR kod arqyly jıi jarnamalaıtyn bolǵan, olardy joıý boıynsha da kúres belsendi júrgizilip otyr», - dedi «ESBOL» qorynyń tóraǵasy Jandos Aqtaev jańa saıttyń tanystyrylymy barysynda. 

Foto: Dáýlet Іztileý/Kazinform

Onyń aıtýynsha, esirtki taratý týraly habarlaǵan azamattardyń jeke basyna qatysty aqparattardyń qupııalylyǵy saqtalady. 

«Bizdiń qor 2014 jyldan bastap jumys istep keledi, al nashaqorlyqty ınternet arqyly taratý, nasıhattaýmen kúresti 2021 jyly qolǵa alǵan. Endi kartany jasaý arqyly máselemen júıeli túrde kúrespekpiz. Elimiz boıynsha volonterler bar, olar bizge túsken aqparatty aldyn ala saralaıdy», - deıdi ol. 

Esbol.kz – karta naqty ýaqyt rejıminde jańartylyp otyrady jáne qoldanýshylar esirtki qylmysyna qatysty kúmándi mán-jaıdy bir sátte jibere alady. 

Joba avtorlarynyń aıtýynsha, kartany iske qosý azamattyq belsendilikti arttyrýǵa jáne esirtki qylmysynyń taralýyna qarsy kúreske baǵyttalǵan. 

Karta Astana qalasynda pılottyq rejımde iske qosyldy, sátti júzege asqan jaǵdaıda barlyq óńirde engiziledi.