Astanada erekshe ustazdar jumys isteıtin mektep týraly bilesiz be

<p>ASTANA. KAZINFORM &ndash; Qazir múmkindigi shekteýli jandar, basqasha aıtqanda erekshe jandar qoǵamnyń belsendi múshesi. Erekshe jandarǵa qatysty máseleniń biri &ndash; eńbekpen qamtý. Olar densaýlyq jaǵdaıyna baılanysty qalaǵan jumysyna tura almaýy múmkin. Sońǵy jyldary elimizde erekshe jandarǵa nazar aýdaryldy, ıaǵnı quqyǵy qorǵalyp, eńbek etýine, el ómirine belsendi aralasýyna jaǵdaı jasalyp jatyr. Búgin &ndash; ustazdar kúni, mereke qarsańynda elordadaǵy №32 mektep-gımnazııanyń erekshe pedagogtarymen tildesken edik.</p>

Atalǵan mektepte barlyǵy 10 múmkindigi shekteýli qyzmetker bar. Onyń ishinde 8 muǵalim jáne 2 kúzetshi erekshe jandar qatarynda. 

Foto: Dáýlet Іztileý/Kazinform

Sonyń biri ustazdyq eńbek jolyn elordadan úsh shaqyrym jerdegi Kolýton aýylynda bastap, atalǵan eldi mekende 25 jyl bala tárbıelep, bilim bergen. Jalpy jumys ótili – 33 jyl. Joǵary bilimdi Qaraǵandy memlekettik ýnıversıtetinde alǵan, mamandyǵy – hımııa-bıologııa pániniń muǵalimi. 

«Aldymen topbasshy boldym, sosyn hımııa, bıologııa páninen sabaq berdim, keıin mektep dırektorynyń oqý jónindegi orynbasary qyzmetin atqardym. Keıin densaýlyq jaǵdaıyma baılanysty Astanaǵa kóship keldik, elordaǵa kelginimizge bıyl 10 jyl boldy», - dedi Dına Djambýrshına. 

Ustazǵa qoıylǵan dıagnoz – revmatoıdty artrıt, bul kez kelgen adamnyń shaldyǵýy múmkin sozylmaly aýtoımmýndy aýrý.

Foto: Dáýlet Іztileý/Kazinform

«Aýylda tıisti deńgeıde em alýǵa, mal baǵyp, sharýa júrgizý qıynǵa soqty, sondyqtan otbasymmen aqyldasa kele kóshýdi jón kórdik, degenmen ózime aýyl unaıtyn. Astanaǵa kelgende birden jumys taba almadym, biraq jumyssyz qalmadym. Úsh jyl jeke oqý ortalyǵynda oqýshylardy bıologııa, hımııa páninen UBT-ǵa daıyndap, dáris berdim. Keıin osy mektepte bos jumys orny shyǵyp, meni qabyldady, 5 jyl jumys istep kelemin», - deıdi ol. 

Áńgime barysynda erekshe jandy ustaz ázilge jaqyn ekenin aıtyp qaldy, ol mektepishilik is-sharalarǵa belsene qatysyp KVN oınaıdy. Biraq, ázil ornymen aıtylýy tıis. Odan bólek, qolóner sheberligimen aınalysady jáne tort pisirgendi unatady. 

«Meniń densaýlyq jaǵdaıymdy oqýshylar biledi, olar sabaq kezinde, sabaqtan tys kezde de únemi qol ushyn sozyp, kómektesedi, qoldaý kórsetedi. Oqýshylardyń qoldaýy meni qanattandyrady», - deıdi muǵalim. 

Osy mekteptiń taǵy bir muǵalimi, erekshe qajettiligi bar jan Álı Asqaruly. Ol Qostanaı oblysy Torǵaı qalasynyń týmasy, Arqalyq memlekettik pedagogıkalyq ınstıtýtynyń túlegi. Mamandyǵy – geografııa pániniń muǵalimi. 

Foto: Dáýlet Іztileý/Kazinform

«Joǵary oqý ornyn támamdap, dıplom alǵan soń jastar praktıkasy boıynsha 6 aı bilim berý ortalyǵynda jumys istedim. 2022 jyldan bastap osy mektepte ustazdyq etip kelemin. Sonymen qatar, qazir Eýrazııa ulttyq ýnıversıtetinde óz mamandyǵym boıynsha magıstratýrada (ІІ kýrs) oqyp jatyrmyn. Ustazdyq joldy tańdaýyma otbasymnyń yqpaly zor, sebebi atam mektep dırektory bolǵan, áke-sheshem de pedagog, ákem orys tili pániniń muǵalimi, anam psıholog ári bastaýysh synyp muǵalimi. Men sol joldy jalǵastyrǵym keldi», - dedi Álı Asqaruly. 

Jas mamannyń aıtýynsha, ustazdyq joldy tańdaǵan adamǵa úlken jaýapkershilik júkteledi. 

«Ár sabaǵymdy zamanaýı ádis-tásilderdi qoldanyp ótkizýge tyrysamyn. Aldymen balalarmen jumys istep, qyzyqtyrý qajet, áıtpese seniń sabaǵyńa nemquraıly qaraıtyn bolady. Sondyqtan balalardyń tilin taýyp, arasynda sabaqty oıyn túrinde de ótkizip turamyn», - degen pikir bildirdi. 

Álı kúndelikti sabaqtan bólek, oqýshylardy pándik olımpıada jáne ǵylymı jobalarǵa daıyndaıdy. Oqýshylarynyń jetistikteri de bar. 

«Bizdiń mektepte jas mamandarǵa arnalǵan túrli semınar, dárister uıymdastyrylady. Ol jerde bilikti ustazdar óz tájirıbesimen bólisedi. Árıne, men jas maman bolǵandyqtan úırenerim kóp, qalmaı qatysamyn. Odan bólek, qalalyq deńgeıdegi biliktilikti arttyrý kýrstaryna baryp, tájirıbemdi arttyryp júrmin. Birden aıtý kerek, muǵalim bolý ońaı emes, óte joǵary jaýapkershilikti talap etedi. Sebebi biz memlekettiń bolashaǵyn jalǵastyratyn azamattardy daıyndap jatyrmyz. Sol sebepti pedagog mamandyǵyn tańdar aldynda jaqsylap oılanǵan abzal», - dep tolyqtyrdy jas ustaz.