Astanada eńbekaqy tólemegen myńnan astam zańdy tulǵa jaýapkershilikke tartyldy

ASTANA. 26 aqpan. QazAqparat - 2012 jyly eńbek ınspektsııasy eńbek zańnamasynyń saqtalýyn baqylaý barysynda 1219 kásiporynǵa tekserý júrgizip, 1136 laýazymdyq jáne zańdy tulǵany ákimshilik jaýapkershilikke tartty.

Bul týraly búgin qalalyq ákimdikte ótken úshjaqty komıssııanyń kezekti otyrysynda QR Eńbek jáne halyqty áleýmettik qorǵaý mınıstrliginiń Astana qalasy boıynsha Baqylaý jáne áleýmettik qorǵaý departamentiniń dırektory Erkin Rahymbergenov málim etti, dep habarlady ákimdik saıty.

Saıttyń jazýynsha, zańǵa baǵynbaǵan 20 kásiporynnyń basshysyna ákimshilik aıyppul salyndy, jalaqyny ýaqtyly bermegen 8 basshyǵa qatysty qylmystyq is qozǵaldy. Osylaısha, qabyldanǵan sharalardyń nátıjesinde 3500 jumysshynyń jalaqysy berildi.

Buǵan qosa, otyrys barysynda Astana qalasy ákiminiń orynbasary Aıda Balaeva Іshki saıasat basqarmasyna adamdardyń eńbek quqyqtaryn buzý máselelerimen aınalysatyn «jedel baılanys» jelisin ashýdy tapsyrdy.

2011 jyldyń alty aıynda eńbek zańnamasynyń saqtalýyn baqylaý barysynda Baqylaý jáne áleýmettik qorǵaý departamentiniń memlekettik eńbek ınspektorlary 500 kásiporyn men uıymǵa tekserý júrgizip, 492 laýazymdyq jáne zańdy tulǵa ákimshilik jaýapkershilikke tartyldy.

Jalaqyny tólemegen kásiporyndardy memlekettik eńbek ınspektorlarymen qatar, sot organdary da ákimshilik jaýapkershilikke tartty.